Kreu i Partisë Demokratike, Sali Berisha akuzooi se autorët e atentatit të ndodhur dy ditë më parë në Rinas ishin të lidhur me qeverinë.
Ai u shpreh se nga përgatitja profesionale, autorët mund të konsiderohen edhe anëtarë të Forcave Speciale.
Berisha tha se viktima dhe i plagosuri kishin lidhje me dy ministra të kabinetit të shkuar. Ai e konsideroi ngjarjen një dëshmi të “narkoshtetit”.
“Viktima dhe i plagosuri ishin të lidhur me dy ministra të kabinetit të shkuar. Ndiqeni me interes. Pas zgjedhjeve Shaljani shpërblehet me spaletat e oficerit të policisë.
Ata që ekzekutuan Gilmando Danin ishin njerëz të qeverisë, më të fuqishëm se viktimat e tyre.
Ju e patë, ata tre vrasës mund t’i cilësosh fare mirë anëtarë të Forcave Speciale nga shkalla e përgatitjes.
Mund të jenë edhe vrasës me pagesë por në emër të bandave më të fuqishme të cilëve iu vu në dispozicion aeroporti për të kryer hakmarrjen e tyre.
Banda nuk zgjodhi një rrugë diku larg të ndërtonte pritën, sepse kishte në kontroll të plotë aeroportin, dëshmi kjo e narkoshtetit”, tha ai.
