Një sulm vetëvrasës jashtë një gjykate në kryeqytetin pakistanez Islamabad ka shkaktuar 12 viktima dhe të paktën 27 të plagosur, njoftoi ministri i Brendshëm i vendit, Mohsin Naqvi.
Naqvi tha se autori kishte planifikuar të hynte në ambientet e gjykatës, por nuk arriti të depërtonte brenda dhe më pas shpërtheu veten pranë një automjeti policie, pasi kishte pritur deri në 15 minuta në zonë.
“Autoritetet do të bëjnë gjithçka për të identifikuar autorin dhe për t’i sjellë para drejtësisë të gjithë personat e përfshirë,” deklaroi ministri. Ai shtoi se të plagosurit po marrin trajtim mjekësor në spitalet e kryeqytetit, përcjell BBC.
Pamjet e transmetuara nga vendngjarja treguan tymë të dendur që ngrihej nga një automjet i djegur plotësisht, ndërsa forcat e sigurisë kishin rrethuar zonën pranë gjykatës së distriktit. Sulmi ndodhi rreth orës 12:39 me orën lokale (07:39 GMT).
Presidenti pakistanez Asif Ali Zardari e dënoi ashpër aktin, duke e cilësuar si “një sulm të urryer ndaj qytetarëve të pafajshëm”.
Një avokat, Rustam Malik, i cili ndodhej në afërsi të vendit në momentin e shpërthimit, tregoi për agjencinë AFP:
“Dëgjova një shpërthim shumë të fortë. Ishte kaos total. Njerëzit po vraponin brenda kompleksit, ndërsa pashë dy trupa të pajetë pranë portës dhe disa makina të përfshira nga flakët.”
Kryeministri pakistanez Shehbaz Sharif deklaroi se grupe ekstremiste “të mbështetura aktivisht nga India” qëndrojnë pas sulmit, duke e cilësuar atë si “një akt terrorist ndaj qytetarëve të paarmatosur të Pakistanit nga përfaqësues të terrorizmit indian”.
Nju Delhi nuk ka reaguar ende ndaj akuzave, por më parë ka hedhur poshtë pretendime të tilla.
Ndërkohë, në një incident të ndarë të ndodhur një ditë më parë në kryeqytetin indian, Delhi, një makinë shpërtheu, duke vrarë tetë persona dhe plagosur disa të tjerë.
Edhe pse autoritetet indiane nuk e kanë cilësuar ende ngjarjen si akt terrorist, çështja i është referuar agjencisë kundër terrorizmit.
Kryeministri indian Narendra Modi reagoi pas ngjarjes duke thënë:
“Komplotistët pas këtij akti mizor nuk do të shpëtojnë. Të gjithë përgjegjësit do të përballen me drejtësinë, pavarësisht sa e thellë të jetë konspiracioni.”
Ky është sulmi i parë vetëvrasës në Islamabad pas tre vitesh, ndërkohë që pjesë të tjera të Pakistanit janë përballur me shpërthime të ngjashme në vitet e fundit.
