Një ditë tragjike ka përshkuar ishullin e Tenerife në Kanarie, ku tre persona humbën jetën dhe të paktën 15 të tjerë u plagosën si pasojë e valëve jashtëzakonisht të larta, të cilat arritën deri në katër metra. Autoritetet kanë lëshuar paralajmërim për rrezik në bregdet, përcjell Euronews.
Rasti i parë ndodhi në plazhin Roque de Las Bodegas në Taganana, ku gjashtë turistë francezë ranë në det pasi u goditën nga valët e mëdha. Një grua pësuar lëndime të moderuara dhe u transportua me helikopter në spitalin Nuestra Señora de la Candelaria. Katër të tjerët u trajtuan në spitale të ndryshme, ndërsa një i pestë mori ndihmë në vendngjarje.
Një tjetër ngjarje tragjike ndodhi në plazhin El Cabezo de Granadilla de Abona, në jug të ishullit, ku u gjet trupi i pajetë i një burri në det. Përpjekjet e personelit të emergjencës për ta rikthyer në jetë dështuan.
Ngjarja më e rëndë ndodhi në Puerto de la Cruz, në veri të Tenerife, ku dhjetë persona u përplasën nga valët. Një grua u gjet pa shenja jete dhe u konfirmua vdekja e saj nga ekipet mjekësore. Tre persona të tjerë u plagosën rëndë, katër me plagë të moderuara dhe dy me lëndime të lehta, të cilët u hospitalizuan në spitale të ndryshme.
Në mesditë, një burrë tjetër ra në det në zonën Charco del Viento, në komunën La Guancha. Ekipet e helikopterëve e gjetën dhe e transportuan në portin e Santa Cruz de Tenerife, ku u konfirmua vdekja e tij për shkak të plagëve të rënda.
Autoritetet e Ishujve Kanarie kanë paralajmëruar qytetarët për kushtet e rrezikshme të detit dhe u kanë bërë thirrje të respektojnë barrierat dhe paralajmërimet, të qëndrojnë larg bregdetit dhe të tregojnë kujdes të shtuar deri sa kërcënimi të kalojë.
