Presidenti amerikan Donald Trump ka njoftuar se Shtetet e Bashkuara nuk do të marrin pjesë në samitin e G20 që do të mbahet këtë muaj në Johannesburg, Afrikë e Jugut, duke e cilësuar vendin mikpritës si “turp total” për shkak të pretendimeve të pabazuara për diskriminim ndaj komunitetit afrikanas, përcjell BBC.
Në një postim në platformën e tij Truth Social, Trump shkroi: “Afrikanerët po vriten dhe po u konfiskohen tokat në mënyrë të paligjshme. Asnjë zyrtar amerikan nuk do të marrë pjesë derisa këto shkelje të të drejtave të njeriut të ndalojnë.”
Pretendimet për “gjenocid ndaj të bardhëve” janë hedhur poshtë si të pabazuara nga qeveria e Afrikës së Jugut, e cila i cilësoi deklaratat si “të pashkruara në histori” dhe “të paqëndrueshme faktikisht”.
Asnjë parti politike në vend, përfshirë ato që përfaqësojnë komunitetin afrikaner, nuk ka ngritur akuza për gjenocid.
Trump kishte paralajmëruar më herët se do të dërgonte zëvendëspresidentin JD Vance në vend të tij, por Shtëpia e Bardhë konfirmoi se asnjë përfaqësues amerikan nuk do të marrë pjesë në samit.
Qeveria e Afrikës së Jugut reagoi duke theksuar se karakterizimi i afrikanerëve si grup ekskluzivisht i bardhë është i pasaktë dhe se pretendimet për persekutim janë refuzuar edhe nga gjykatat vendase.
Samiti i G20, që mbledh liderët e ekonomive më të mëdha të botës, mbahet çdo vit me qëllim promovimin e stabilitetit ekonomik dhe bashkëpunimit ndërkombëtar. SHBA pritet të jetë mikpritëse e samitit pas Afrikës së Jugut.
