Luftëtarët e Hamasit që ndodhen të ngujuar në zonën e Rafahut, e cila aktualisht kontrollohet nga Izraeli, do të dorëzonin armët në këmbim të një kalimi të sigurt drejt zonave të tjera të Gazës, sipas një propozimi të ri të paraqitur nga ndërmjetësit egjiptianë, thanë dy burime të njohura me negociatat, përcjell Reuters.
Që nga hyrja në fuqi e armëpushimit të ndërmjetësuar nga Shtetet e Bashkuara më 10 tetor, zona e Rafahut ka qenë skenë e të paktën dy sulmeve ndaj forcave izraelite, për të cilat Izraeli ka akuzuar Hamasin, akuzë që grupi militant e ka mohuar.
Sipas një zyrtari të sigurisë egjiptian, plani parashikon që luftëtarët që ende ndodhen në Rafah të dorëzojnë armët e tyre tek autoritetet egjiptiane dhe të ofrojnë informacion për rrjetin e tuneleve në zonë, në mënyrë që ato të mund të shkatërrohen.
Izraeli dhe Hamasi ende nuk kanë dhënë një përgjigje përfundimtare ndaj këtij propozimi, thanë dy burime, ndërsa një e tretë konfirmoi se diskutimet mbi çështjen janë në zhvillim.
Zyra e kryeministrit izraelit nuk pranoi të komentojë, ndërsa zëdhënësi i Hamasit në Gaza, Hazem Qassem, gjithashtu refuzoi të japë deklarata.
Përplasjet në Rafah kanë shkaktuar disa nga episodet më të dhunshme që prej fillimit të armëpushimit, me tre ushtarë izraelitë të vrarë dhe dhjetëra palestinezë që humbën jetën nga sulmet hakmarrëse izraelite.
Dy nga burimet thanë se luftëtarët e Hamasit në Rafah , për të cilët krahu i armatosur i grupit kishte njoftuar se kishte humbur kontaktin që në mars, mund të mos jenë të vetëdijshëm për ekzistencën e armëpushimit. Njëri prej tyre shtoi se largimi i këtyre luftëtarëve është jetik për ruajtjen e marrëveshjes aktuale të paqes.
Nuk dihet ende se sa luftëtarë të Hamasit mund të jenë të ngujuar në zonën e Rafahut.
Armëpushimi, i pari që nga nisja e ofensivës izraelite, është pjesë e planit të presidentit Donald Trump për t’i dhënë fund luftës në Gaza.
Sipas fazës së parë të këtij plani, Hamasi ka liruar 20 pengjet e fundit të gjallë, të rrëmbyer gjatë sulmeve të 7 tetorit 2023, në këmbim të gati 2,000 të burgosurve palestinezë.
Forcat izraelite janë tërhequr nga pjesët perëndimore të Gazës, të cilat mbeten nën kontrollin e Hamasit.
Faza e ardhshme e planit parashikon çarmatimin e plotë të grupit militant dhe dorëzimin e kontrollit të Gazës te një komitet palestinez teknik nën mbikëqyrje ndërkombëtare, si dhe vendosjen e një force shumëkombëshe.
Që nga armëpushimi, Hamasi ka dorëzuar gjithashtu trupat e 22 prej 28 pengjeve të vdekur, duke thënë se shkatërrimet në Gaza e kanë bërë të vështirë gjetjen e të tjerëve. Izraeli e akuzon grupin për zvarritje.
Ndërkohë, sipas Ministrisë së Shëndetësisë së Gazës, Izraeli ka kthyer trupat e 285 palestinezëve.
Sipas shifrave izraelite, militantët e Hamasit rrëmbyen gjithsej 251 pengje gjatë sulmeve të 7 tetorit dhe vranë 1,200 persona. Ndërkohë, ofensiva hakmarrëse izraelite ka shkaktuar pothuajse 69,000 viktima palestineze, përfshirë 241 që prej fillimit të armëpushimit.
