Komisioni i Disiplinës në Federatën Shqiptare të Futbollit ka marrë vendimet për ngjarjet e javës së fundit në të gjitha kategoritë e futbollit shqiptar. Për sjellje të gabuar të tifozëve, janë ndëshkuar klubet e elitës, ndërsa dënime janë dhënë edhe për lojtarë e zyrtarë në divizionet më të ulëta.
AF Elbasani është gjobitur me 200 mijë lekë për akte dhune dhe mungesë rregulli gjatë ndeshjes, ndërsa është urdhëruar të dëmshpërblejë dëmet e shkaktuara në stadiumin “Flamurtari”. Po me 200 mijë lekë është ndëshkuar edhe Flamurtari FC, për hedhje sendesh në fushë dhe ndezje flakadani nga tifozët.
Për sjellje josportive ndaj zyrtarëve të ndeshjes janë pezulluar me katër ndeshje disa zyrtarë e lojtarë, mes tyre:
Ardit Beqiri (KS Korabi)
Romeo Bishdili (KS Besa)
Ditmar Bicaj (KF Lushnja)
Joni Xhaferaj (KF Delvina)
Ervis Caco (FK Tomori)
Ndërsa Qerim Cuni i KF Turbina është dënuar me pesë ndeshje pezullim për sulm ndaj kundërshtarëve.
Disiplina ka marrë masa edhe në kategoritë e moshave, ku janë ndëshkuar disa lojtarë të ekipeve U-19, U-17 dhe U-15 për sjellje josportive.
Në kampionatet e të rinjve janë dhënë edhe masa organizative, si humbje në tavolinë dhe gjoba për ekipe që nuk zhvilluan ndeshjet, përfshirë AFK Kashari U-13, Kamza Junior B U-13, Kamza 07 U-14 dhe TR 19 Akademi U-17, të cilat janë gjobitur me 100 mijë lekë dhe humbje me rezultatin 3–0.
Komisioni ka miratuar gjithashtu kërkesën e Don Bosko Academy për rishikim të një vendimi të mëparshëm, duke lënë në fuqi rezultatin 0–3, ndërsa ka pranuar pezullimin me kusht të dënimit për lojtarin Luis Bicja të FC Pepa U-15.
Vendimet hyjnë menjëherë në fuqi.
