Kina ka realizuar me sukses nisjen e misionit hapësinor Shenzhou-21, duke dërguar në orbitë ekuipazhin e saj të radhës drejt stacionit hapësinor Tiangong, i njohur si “Pallati Qiellor”. Mes astronautëve ndodhet edhe Wu Fei, 32 vjeç, anëtari më i ri i trupës hapësinore kineze që ka udhëtuar ndonjëherë në hapësirë.
Raketa Long March-2F u lëshua nga Qendra e Nisjes Satelitore Jiuquan në veriperëndim të Kinës, duke shënuar misionin e shtatë që nga përfundimi i stacionit hapësinor në vitin 2022.
Ekuipazhi përbëhet nga komandanti Zhang Lu (48), Zhang Hongzhang (39) dhe Wu Fei (32), të cilët do të qëndrojnë për gjashtë muaj në orbitë, përcjell Reuters.
Për herë të parë, ekuipazhi i Shenzhou-21 është shoqëruar edhe nga katër minj të zinj, gjitarët e parë të vegjël që dërgohen në stacionin hapësinor kinez. Ata do të përdoren për eksperimente mbi riprodhimin në orbitën e ulët të Tokës.
Programi Shenzhou ka shënuar përparime të shpejta, përfshirë astronautë të rinj të lindur në vitet ’90, një rekord botëror në ecje hapësinore dhe planet për të dërguar astronautin e parë të huaj nga Pakistani vitin e ardhshëm.
Këto zhvillime kanë shtuar rivalitetin me SHBA-në, e cila po përpiqet të rikthejë astronautët e saj në Hënë përpara Kinës.
Dy vendet po konkurrojnë edhe në krijimin e institucioneve hapësinore, me SHBA-në që udhëheq Artemis Accords dhe Kinën që bashkëpunon me Rusinë për Stacionin Ndërkombëtar Hënor.
Misioni Shenzhou-21 është një tjetër hap drejt ambicieve të Kinës për të qenë një fuqi e madhe në eksplorimin hapësinor.
