Seanca paraprake në Gjykatën e Shkallës së Parë për Krimet e Rënda (GJKKO) lidhur me ish-presidentin Ilir Meta, bashkëshorten Monika Kryemadhi dhe persona të tjerë është shtyrë sërish. Arsyeja është mungesa e avokatit të Kryemadhit, Redi Llanaj, i cili u arrestua dhe më pas u la në arrest shtëpie pas një incidenti me rojen e sigurisë në gjykatën e Vlorës. Vetë ish-deputetja Kryemadhi ishte prezente në seancë. Seanca e radhës u caktua për më 11 nëntor.
Gjyqtarja Irena Gjoka pezulloi afatet e paraburgimit të Metës, ndërsa SPAK prezantoi prova të reja në gjykatë. Avokati i Metës, Kujtim Cakrani, kritikoi vendimin e gjyqtares, duke e akuzuar se po vepron nën “shantazh” nga prokurorët për hetimet e nisura mbi akuzat e ngritura nga Sali Berisha.
Sipas Cakranit, gjyqtarja pezullon afatet e paraburgimit edhe kur avokati i të pandehurit tjetër mungon, duke penguar procesin normal gjyqësor.
Ndërkohë, Monika Kryemadhi sulmoi kreun e SPAK, Altin Dumani, duke deklaruar se hetimet po zgjaten me qëllim që të mbajnë Metën në paraburgim dhe për të ushtruar presion mbi të dhe familjen e saj. Kryemadhi u shpreh se disa nga hetuesit janë “ushtarë të bindur të Yuri Kim”.
Dosja e Meta dhe Kryemadhit përfshin hetime në lidhje me aferën CEZ-DIA, lobimin e LSI-së në SHBA dhe hetimin pasuror. Ata akuzohen për korrupsion pasiv, pastrim parash dhe mosdeklarim pasurie. Të pandehurit e tjerë përfshijnë Pirro Xhixhon, i akuzuar për korrupsion pasiv të funksionarëve të lartë në bashkëpunim.
Hetimet nga SPAK përfunduan më 28 korrik, ndërsa dosja u kalua për gjykim në fund të gushtit.
