Uragani Melissa u forcua në një stuhi të fuqishme të kategorisë 4 të dielën, duke kërcënuar me disa ditë erëra dhe shi katastrofik në Karaibet e veriut. Qeveria e Xhamajkës urdhëroi evakuime të detyrueshme për zonat më të prekshme, përfshirë kryeqytetin Kingston.
Autoritetet kishin paralajmëruar më parë banorët në zonat e ulëta dhe të përmbytshme që të gjenin strehim, ndërsa Melissa ngjitej shpejt në shkallën e uraganeve Saffir-Simpson, me mundësinë të intensifikohej në kategori 5 të hënën, përcjell Guardian.
Gjatë një konference për shtyp në Kingston të dielën, autoritetet thanë se të dy aeroportet ndërkombëtare ishin të mbyllura dhe u aktivizuan 881 strehimore. Ministri i qeverisjes lokale, Desmond McKenzie, paralajmëroi: “Shumë nga këto komunitete nuk do të mbijetojnë përmbytjet. Kingston është shumë e ulët. Asnjë komunitet në Kingston nuk është i imunizuar.”
Kryeministri Andrew Holness urdhëroi më pas evakuimin e detyrueshëm të Port Royal dhe gjashtë zonave të tjera të prekshme, duke përfshirë Old Harbour Bay, dhe u bëri thirrje banorëve: “Ju lutem merrni seriozisht kërcënimin e motit. Merrni të gjitha masat për t’u mbrojtur.”
Uragani ishte i vendosur rreth 205 km në jug-jugperëndim të Kingston dhe 495 km në jug-jugperëndim të Guantánamos në Kubë, duke lëvizur ngadalë në drejtim perëndimor me 7 km/orë. Qendra Kombëtare e Uraganeve të SHBA raportoi se erërat maksimale të qëndrueshme arrinin 230 km/orë dhe mund të arrinin mbi 250 km/orë nëse uragani intensifikohet në kategori 5.
Prurjet e shiut pritet të arrijnë deri në 76 cm në Xhamajkë dhe pjesën jugore të Ishapës së Hispaniolës, me disa zona që mund të marrin deri në 1 metër ujë. Përveç këtyre, parashikohet dëmtim i madh i infrastrukturës, ndërprerje energjie dhe komunikimi, si dhe izolim i komuniteteve.
Disa banorë të Port Royal refuzuan të largohen nga shtëpitë e tyre, duke mbështetur mbrojtjen e tyre tek përvoja dhe përgatitjet personale. Ann Marie Chamberlain, 51 vjeçe, tha: “Ati Zot do të na mbrojë. Të gjitha varkat janë tërhequr, çatitë e zinkut janë siguruar, po marrim të gjitha masat e nevojshme.”
Melissa pritet të godasë Kubën të martën dhe më pas Bahamet, duke sjellë deri në 300 mm shi në disa zona. Deri tani, stuhia ka shkaktuar të paktën tre viktima në Haiti dhe një në Republikën Dominikane, ndërsa një person mbetet i zhdukur.
Meteorologët paralajmërojnë se ngadalësimi i lëvizjes së uraganit dhe intensifikimi i tij e bëjnë këtë një katastrofë potenciale rekord për rajonin. Melissa është stuhia e 13-të e emërtuar e sezonit të uraganeve në Atlantik, i cili zgjat nga 1 qershori deri më 30 nëntor dhe pritej të ishte mbi normalin, me 13 deri 18 stuhira të emërtuara.
