Sot, Kuvendi i Shqipërisë zhvillon një seancë plenare të ngarkuar, ku do të raportojnë drejtuesit e disa prej institucioneve më të rëndësishme të drejtësisë dhe rendit.
Në fillim, deputetët do të miratojnë procesverbalin e seancës së kaluar dhe do të shqyrtojnë dy projektvendime me rëndësi — për ngritjen e Komisionit të Posaçëm për Reformën Zgjedhore dhe Komisionit të Posaçëm për Reformën Administrativo-Territoriale.
Pas këtyre çështjeve, Kuvendi do të dëgjojë raportimet vjetore për vitin 2024 nga drejtuesit e institucioneve të sistemit të drejtësisë. Në foltore do të dalë Prokurori i Përgjithshëm, Olsian Çela, i cili do të paraqesë gjendjen e kriminalitetit në vend.
Më pas, pritet raportimi më i ndjekur i ditës — ai i drejtuesit të SPAK-ut, Altin Dumani, për luftën kundër korrupsionit dhe krimit të organizuar. Raportimi i tij do të zhvillohet në një klimë të ngarkuar politike, pasi opozita e udhëhequr nga Sali Berisha pritet të kërkojë llogari për hetimet që kanë përfshirë zyrtarë të lartë të qeverisë, ndërsa mazhoranca shihet me shqetësim për shkak të faktit që një prej figurave të saj kryesore, zëvendëskryeministrja Belinda Balluku, është aktualisht nën hetim nga SPAK.
Kështu, Dumani pritet të gjendet mes dy presioneve politike — një opozite që e akuzon për selektivitet dhe një mazhorance që e sheh me shqetësim intensifikimin e hetimeve ndaj zyrtarëve të saj.
Në vijim, raportime do të paraqesin edhe Inspektori i Lartë i Drejtësisë, Artur Metani, Kryetari i Këshillit të Lartë Gjyqësor, Ilir Rusi, dhe Kryetarja e Këshillit të Lartë të Prokurorisë, Mirela Bogdani.
Në fund të seancës, deputetët do të zhvillojnë diskutime mbi çështje të ngritura nga zgjedhësit nëpër rrethe. Për shkak të volumit të madh të raportimeve dhe debateve, seanca pritet të zgjasë gjatë gjithë ditës.
