Kryeministrja e Lituanisë, Inga Ruginienė, ka njoftuar masa të ashpra kundër balonave që transportojnë cigare kontrabandë nga Bjellorusia, duke i cilësuar si “sulme hibride” që kërcënojnë sigurinë kombëtare dhe stabilitetin rajonal.
Vendimi vjen pas mbylljes së përkohshme të aeroportit të Vilniusit katër herë brenda javës dhe bllokimit të pikave kufitare me Bjellorusinë, përcjell The Guardian.
Ruginienė paralajmëroi se qeveria mund të kërkojë aktivizimin e nenit 4 të traktatit të NATO-s për konsultime të sigurisë.
Ajo akuzoi presidentin autoritar të Bjellorusisë, Alexander Lukashenko, për mosndërhyrje në ndalimin e këtyre veprimeve, duke e cilësuar si bashkëpunim të heshtur me destabilizimin rus.
Masat e marra përfshijnë:
Mbylljen e pikave kufitare me Bjellorusinë, përveç rasteve diplomatike dhe udhëtimeve të qytetarëve të BE-së që largohen nga vendi fqinj.
Autorizimin për rrëzimin e balonave që hyjnë në hapësirën ajrore lituaneze.
Thirrjen e diplomatit rus pas një shkeljeje të hapësirës ajrore nga dy avionë ushtarakë rusë nga Kaliningradi.
Ministria e Mbrojtjes e Lituanisë raportoi se një avion luftarak Sukhoi SU-30 dhe një tanker IL-78 kaluan 700 metra në hapësirën ajrore lituaneze për 18 sekonda, ndoshta gjatë një stërvitjeje për furnizim ajror.
Moska mohoi shkeljen, duke deklaruar se fluturimet ishin në përputhje me rregullat mbi territorin rus.
Ministri i Jashtëm Kęstutis Budrys e cilësoi incidentin si pjesë e një serie provokimesh të qëllimshme: “Këto nuk janë raste të izoluara, por provokime të kalkuluara për të destabilizuar, shpërqendruar dhe testuar vendosmërinë e NATO-s.”
Ngjarjet vijnë në një kontekst më të gjerë tensioni në rajon, ku vendet baltike, Lituania, Letonia dhe Estonia, janë përballur me shkelje të përsëritura të kufijve ajrorë nga avionë dhe dronë rusë, ndërsa mbështesin fuqishëm Ukrainën në luftën kundër agresionit rus.
