Izraeli po përgatitet të marrë trupat e dy pengjeve të premten në mbrëmje, sipas burimeve zyrtare, në kuadër të një armëpushimi të brishtë me Hamasin.
Zyrtarët izraelitë thonë se grupi militant mund të dorëzojë edhe tetë trupa të tjerë, ndërsa fati i pesë pengjeve mbetet i panjohur.
Kjo lëvizje vjen pas kthimit të trupave të Arie Zalmanowicz dhe Tamir Adar gjatë natës së kaluar. Para marrëveshjes së armëpushimit, në Gaza mbaheshin 28 trupa pengjesh; aktualisht, sipas autoriteteve izraelite, numri ka zbritur në 13.
“Ata po luajnë lojëra dhe po zvarrisin armëpushimin pa kaluar në fazën e dytë, ku duhet të çarmatosen”, tha një zyrtar izraelit, duke shtuar se SHBA “na kupton”, veçanërisht për rastin e dy shtetasve amerikanë të vrarë: Kapiten Omer Neutra dhe Rreshter Itay Chen, përcjell Ynet.
Ndërkohë, Hamas pretendon se vonesat janë thjesht logjistike, për shkak të nevojës për pajisje të rënda për të gjetur trupat mes rrënojave.
Presidenti turk Recep Tayyip Erdogan ka mbështetur këtë qëndrim, duke akuzuar Izraelin për shkelje të marrëveshjes përmes sulmeve të vazhdueshme dhe ka kërkuar sanksione ndaj Tel Avivit, si dhe ndalimin e shitjes së armëve.
“Po bëjmë përgatitje për rindërtimin e Gazës. Duhet presion diplomatik ndaj Izraelit”, tha Erdogan, duke përmendur diskutimet në vazhdim për një forcë ndërkombëtare stabilizuese në rajon.
Në terren, tensionet mbeten të larta. Aktivistë nga lëvizja “Order 9” bllokuan kamionët me ndihma humanitare drejt Gazës në pikën kufitare Kerem Shalom, duke detyruar ndërhyrjen e policisë.
Familjet e pengjeve jetojnë në pritje të dhimbshme. Ruby Chen, babai i Itay Chen, tha: “Pres telefonatën më të keqe të jetës sime, dhe kur nuk vjen, zhgënjehem. Ku është angazhimi i Izraelit për t’i kthyer në shtëpi?”
Shumica e pengjeve të mbetura janë ushtarë, punonjës emergjence dhe oficerë policie që reaguan menjëherë gjatë sulmit të 7 tetorit. Rotem Cooper, djali i pengut Amiram Cooper, e përshkroi situatën si “një lojë horror”, ku çdo natë pritet një telefonatë që mund të sjellë lajmin e kthimit, ose jo.
