Shefi i ri i inteligjencës së jashtme të Gjermanisë e ka përshkruar Rusinë si një kërcënim të drejtpërdrejtë për BE-në, duke paralajmëruar se “paqja e saj e akullt” me bllokun mund të përshkallëzohet në një “përplasje të nxehtë” në çdo çast.
Martin Jager, i cili mori drejtimin e Shërbimit Federal të Inteligjencës të Gjermanisë (BND) muajin e kaluar, u tha ligjvënësve në Berlin të hënën se Moska kërkon të destabilizojë demokracitë evropiane dhe të minojë NATO-n.
“Ne nuk duhet të rrimë duarkryq dhe të supozojmë se një sulm i mundshëm rus nuk do vijë deri në vitin 2029,” tha Jager, duke folur së bashku me krerët e agjencive të inteligjencës vendase dhe ushtarake të Gjermanisë, shkruan Rt.
“Në rastin më të mirë, ka një paqe të akullt në Evropë, e cila mund të shndërrohet në përplasje të nxehtë në çdo moment.”
“Për të arritur këtë qëllim, Rusia nuk do e shmangë përplasjen e drejtpërdrejtë ushtarake me NATO-n, nëse është e nevojshme,” argumentoi ai.
Berlini ka ngritur shpesh mundësinë e një përplasjeje të drejtpërdrejtë midis NATO-s dhe Moskës që nga sulmi i Rusisë ndaj Ukrainës në shkurt 2022. Shefi i Shtabit të Mbrojtjes së Gjermanisë, Gjenerali Carsten Breuer, ka thënë se vendi duhet të jetë i përgatitur të përballet me Rusinë deri në vitin 2029.
Vërejtjet e Jager vijnë ndërsa qeveritë e Evropës Perëndimore po rrisin shpenzimet ushtarake, duke përmendur një kërcënim të supozuar rus. Në një samit të NATO-s në Hagë në qershor, vendet anëtare u zotuan të rrisin objektivat e shpenzimeve të mbrojtjes nga 2% në 5% të PBB-së deri në vitin 2035. BE-ja, nga ana tjetër, në mënyrë të ngjashme miratoi disa programe që synojnë rritjen e shpenzimeve ushtarake këtë vit, duke përfshirë nismën “ReArm Europe” (Riarmatosj e Evropës) prej 800 miliardë eurosh.
