Joel Mokyr, Philippe Aghion dhe Peter Howitt fituan çmimin Nobel për Ekonomi 2025 të hënën për punën e tyre mbi mënyrën se si inovacioni dhe forcat e “shkatërrimit krijues” mund të nxisin rritjen ekonomike dhe të rrisin standardet e jetesës në mbarë botën.
Hulumtimi i tyre shpjegon se si teknologjia lind produkte dhe metoda të reja prodhimi të cilat zëvendësojnë ato të vjetrat, duke çuar në një standard më të mirë jetese, shëndet dhe cilësi të jetës.
“Për dy shekujt e fundit, për herë të parë në histori, bota ka parë rritje ekonomike të qëndrueshme. Kjo ka nxjerrë një numër të madh njerëzish nga varfëria dhe ka hedhur bazat e mirëqenies tonë,” tha në një deklaratë Akademia Mbretërore Suedeze e Shkencave, e cila jep çmimin.
Laureatët kanë treguar gjithashtu se ky zhvillim nuk mund të merret si i mirëqenë, tha Akademia.
Ndërsa shumica e ekonomistëve e shohin rritjen ekonomike si një nxitës të mirëqenies, ka disa që nuk e shohin atë si një të mirë të patjetërsueshme.
Çmimin e Ekonomisë 2024 e fituan Daron Acemoglu, Simon Johnson dhe James Robinson për punën mbi pabarazinë, dhe Johnson në veçanti ka theksuar se si përfitimet e inovacionit teknologjik mund të anojnë drejt elitave të fuqishme, shkruan Reuters.
Çmimi prestigjioz, i njohur zyrtarisht si Çmimi Sveriges Riksbank në Shkencat Ekonomike në Kujtim të Alfred Nobel, është çmimi i fundit që jepet këtë vit dhe vlen 11 milionë korona suedeze (1.2 milionë dollarë).
Mokyr, një profesor në Universitetin Northwestern në Shtetet e Bashkuara, iu dha gjysma e çmimit.
Aghion, një profesor në Collège de France dhe INSEAD në Paris dhe në London School of Economics and Political Science, dhe Howitt, një profesor në Universitetin Brown në Shtetet e Bashkuara, ndanë gjysmën tjetër.
