Dhjetëra persona kanë humbur jetën në një sulm me dron ndaj një strehë për të zhvendosurit në qytetin e rrethuar të el-Fasher në Sudan, i cili është në prag të kolapsit, njoftuan aktivistët për BBC.
Komiteti i rezistencës së el-Fasher, i përbërë nga qytetarë lokalë dhe aktivistë, bëri me dije se Forcat Paramilitare të Mbështetjes së Shpejtë (RSF) goditën kampin Dar al-Arqam, i vendosur brenda një universiteti, me dy sulme dronësh dhe tetë predha artilerie.
“Fëmijë, gra dhe të moshuar u vranë në mënyrë të ftohtë, ndërsa shumë u dogjën plotësisht,” thuhet në deklaratën e grupit.
Dëshmitarët okularë përshkruan skena paniku ndërsa shpëtimtarët nxirrnin trupat nga rrënojat.
Rrjeti i Mjekëve të Sudanit raportoi 57 viktima, përfshirë 17 fëmijë, dhe 17 të plagosur nga sulmi me dron. Aktivistët flasin për të paktën 60 të vrarë.
Forcat RSF nuk kanë dhënë koment në lidhje me ngjarjen.
Spitalet, që janë të mbingarkuara pas muajsh rrethimi, po trajtojnë të plagosurit në dysheme dhe korridore.
RSF ka rrethuar el-Fasher-in për 17 muaj me radhë, në përpjekje për të marrë kontrollin mbi fortifikimin e fundit të ushtrisë sudaneze në rajonin e Darfurit.
Situata në el-Fasher, sipas grupit të rezistencës, është “tej katastrofës dhe gjenocidit”.
Sudani është përfshirë nga konflikti që nga viti 2023, kur komandantët kryesorë të RSF dhe ushtrisë sudaneze u përplasën dhe nisi një luftë brutale për pushtet, duke krijuar një nga krizave më të rënda humanitare në botë.
Ushtria kontrollon pjesën më të madhe të veriut dhe lindjes, ndërsa el-Fasher është qendra e fundit urbane kryesore në Darfur që mbahet nga ushtria dhe aleatët e saj. RSF kontrollon pothuajse gjithë Darfurin dhe pjesë të Kordofanit fqinj.
Nëse el-Fasher bie, RSF do të kontrollojë të gjithë rajonin e Darfurit dhe synon të krijojë një qeveri alternative atje.
Në javët e fundit, RSF ka intensifikuar sulmet mbi el-Fasher, duke bërë që ekspertët të paralajmërojnë se qyteti mund të bie shumë shpejt nëse ushtria nuk merr forca të menjëhershme ndihmëse.
Hulumtimet tregojnë se RSF ka përfunduar ndërtimin e një muri toke rreth el-Fasher-it, duke forcuar rrethimin dhe vështirësuar daljen e civilëve.
OKB-ja njoftoi se 250,000 civilë janë të bllokuar në el-Fasher dhe paralajmëroi se goditjet e vazhdueshme ndaj zonave civile mund të konsiderohen krime lufte.
Uria dhe sëmundjet janë përhapur në qytet, ndërsa banorët përballen me bombardime të vazhdueshme dhe mungesa të ushqimit dhe barnave.
Para dy ditësh, të paktën 13 persona u vranë pasi RSF bombardoi një nga spitalet e fundit që funksionojnë në el-Fasher.
Komisioneri i Lartë i OKB-së për të Drejtat e Njeriut, Volker Türk, dënoi vrasjet dhe plagosjet e vazhdueshme të civilëve.
“Jam i tronditur nga mungesa e plotë e respektit të RSF ndaj jetës civile,” tha ai.
Më shumë se 150,000 njerëz kanë vdekur në konfliktin që ka përfshirë vendin, ndërsa rreth 12 milionë janë detyruar të largohen nga shtëpitë e tyre.
