Presidenti i SHBA-së, Donald Trump, njoftoi të enjten në mëngjes se Izraeli dhe Hamasi kanë nënshkruar fazën e parë të planit të tij të paqes për t’i dhënë fund luftës në Rripin e Gazës.
Kryeministri Benjamin Netanyahu tha menjëherë pas kësaj: “Me ndihmën e Zotit, po i kthejmë të gjithë në shtëpi”.
“Jam shumë krenar të njoftoj se Izraeli dhe Hamasi kanë nënshkruar të dy Fazën e parë të Planit tonë të Paqes”, shkroi Trump në Truth Social.
“Kjo do të thotë që TË GJITHË pengjet do të lirohen shumë shpejt dhe Izraeli do të tërheqë trupat e tij në një vijë të rënë dakord si hapat e parë drejt një Paqeje të Fortë, të Qëndrueshme dhe të Përjetshme.
Të gjitha palët do të trajtohen në mënyrë të drejtë! Kjo është një DITË E MADH për Botën Arabe dhe Muslimane, Izraelin, të gjitha kombet përreth dhe Shtetet e Bashkuara të Amerikës, dhe ne falënderojmë ndërmjetësit nga Katari, Egjipti dhe Turqia, të cilët punuan me ne për ta bërë të mundur këtë Ngjarje Historike dhe të Pashembullt. TË BEKUAR QOFSHIN PAQËBËRËSIT!”
Përpara njoftimit, Trump mbajti një konferencë për shtyp në Shtëpinë e Bardhë ku Sekretari i Shtetit Marco Rubio i dorëzoi një shënim dhe i pëshpëriti në vesh, shkruan Ynet.
Trump u tha gazetarëve: “Sapo mora një shënim nga sekretari i shtetit, ku thuhej se jemi shumë afër një marrëveshjeje në Lindjen e Mesme dhe se ata do të kenë nevojë për mua shumë shpejt.”
