Ministrja e Jashtme, Elisa Spiropali, ka reaguar me indinjatë ndaj komenteve dhe publikimeve në rrjetet sociale që kanë glorifikuar aktin e vrasjes së gjyqtarit Astrit Kalaja, i cili u qëllua për vdekje në sallën e Gjykatës së Apelit.
Spiropali e ka cilësuar “jashtëzakonisht tronditëse” përpjekjen për të paraqitur si heroik veprimin e autorit të krimit dhe për të baltosur viktimën.
Ajo shtoi se nevojitet ndërgjegjësim dhe reflektim për masa ligjore që mbrojnë dinjitetin e individit po aq sa edhe lirinë e shprehjes.
Spiropali ka dënuar publikimet e paverifikuara dhe komentet fyese ndaj gjyqtarit të ndjerë, duke theksuar se “Shqipëria e vërtetë është vlerë, respekt dhe dinjitet.”
“Jashtëzakonisht tronditëse përpjekja e këtyre ditëve për të glorifikuar aktin barbar të vrasjes së gjyqtarit Kalaja përmes një serie publikimesh në media, pasuar nga një lum komentesh të neveritshme në adresë të viktimës.
Po aq indinjuese është edhe tentativa për të justifikuar vrasësin për veprimin ekstrem që mori një jetë njeriu dhe lëndoi dy të tjerë.
Urrejtja mbi viktimat dhe lartësimi i agresorëve duke shfrytëzuar lirinë për të shkruar e komentuar në hapësirën digjitale, nuk mund të jetë kurrsesi Shqipëria Europiane.
Ndërkohë që me BE-në po negociojmë për t’iu afruar përherë e më shumë standardeve të medias e etikës demokratike europiane, nevojitet një ndërgjegjësim dhe reflektim i plotë për masat e ardhshme ligjore që mbrojnë dinjitetin e individit, po aq sa edhe lirinë e shprehjes.
Publikimet e paverifikuara mbi protagonizmin vrastar dhe vala e komenteve baltosëse në rrjetet sociale mbi viktimën nuk mund të jetë kurrsesi fytyra e shoqërisë shqiptare.
Shqipëria e vërtetë është shumë më shumë se kaq; është vlerë, është respekt, është dinjitet!
Ngushëllimet më të ndjera familjarëve të gjyqtarit Kalaja dhe solidaritet me gjyqtarët, prokurorët dhe gjithë shërbëtorët e shtetit shqiptar!”, shkruan Spiropali.
