Izraeli mirëpriti të premten në mbrëmje ultimatumin e vendosur nga Presidenti i SHBA-së Donald Trump ndaj Hamasit, ndërsa sqaroi se nuk kishte asnjë koordinim mbi mesazhin që ai publikoi në llogarinë e tij Truth Social.
Jerusalemi kishte parashikuar një ultimatum të tillë, pasi Trump paralajmëroi se do t’i jepte grupit militant tre deri në katër ditë për t’u përgjigjur. Meqë nuk do të merrte përgjigje, presidenti vendosi një afat të prerë : ora 1 e mëngjesit sipas kohës së Izraelit, midis të dielës dhe të hënës.
Kritikët e propozimit 20-pikësh të Trump vunë në dukje se atij i mungonte një afat kohor. Në postimin e tij, Trump e bëri të qartë se nuk do të pranonte një përgjigje të paqartë të Hamasit në stilin “po, por”.
Ai shkroi: “Një marrëveshje duhet të arrihet me Hamasin deri të dielën në mbrëmje, në orën 6 pasdite sipas kohës së Uashingtonit. Çdo komb e ka nënshkruar këtë. Nëse nuk arrihet marrëveshja e shansit të fundit, ferri – si kurrë më parë – do të hapet për Hamasin.” Ai shtoi: “Do të ketë paqe në Lindjen e Mesme, në një mënyrë ose në një tjetër.”
Kryeministri Benjamin Netanyahu thirri të premten një diskutim mbi sigurinë, të përqendruar në skenarët e mundshëm. Izraeli po përgatitet si për një përgjigje pozitive, ashtu edhe për një presion ushtarak të intensifikuar dhe një pushtim të plotë të Qytetit të Gazës, me atë që zyrtarët e përshkruajnë si “mbështetje absolute” të Trump.
Shefi i Shtabit, gjenerallejtënant Eyal Zamir paralajmëroi se një veprim i tillë mund t’i rrezikonte pengjet. Ushtria u ka thënë familjeve të disa robërve se të dashurit e tyre po mbahen mbi tokë në Qytetin e Gazës.
Zyrtarët izraelitë besojnë se ultimatumi i Trumpit synon të ushtrojë presion të madh mbi Hamasin, me Katarin dhe Turqinë, aleatët e tij kryesorë, që gjithashtu shprehin mbështetje të plotë për planin e SHBA-së. Si Ankaraja ashtu edhe Doha i kanë kërkuar Hamasit të thotë po i pari dhe më pas të negociojë, shkruan Ynet.
Presidenti turk, Recep Tayyip Erdogan, foli të premten me Trumpin, duke diskutuar lidhjet dypalëshe dhe situatën në Gaza. Thuhet se Erdogan bëri thirrje për ndalimin e sulmeve ajrore izraelite, duke e quajtur këtë hap “kritik për suksesin e përpjekjeve për paqe në rajon”.
Postimi i Trumpit ishte gjithashtu i drejtuar ndaj operativëve të Hamasit. “Më shumë se 25,000 ‘ushtarë’ të tij janë të vdekur.
Shumica e pjesës tjetër janë të rrethuar dhe të bllokuar ushtarakisht. Ata thjesht po presin që unë të jap urdhrin ‘SHKO’ në mënyrë që jetët e tyre të marrin fund”, shkroi ai.
“Sa i përket pjesës tjetër, ne e dimë se ku jeni dhe kush jeni, do të gjurmoheni dhe do të vriteni. Hamasit do t’i jepet një shans i fundit. Shtetet e mëdha, të fuqishme dhe të pasura në Lindjen e Mesme, së bashku me SHBA-në dhe me firmën e Izraelit, kanë rënë dakord për paqe në rajon. Marrëveshja gjithashtu mbron jetën e të gjithë luftëtarëve të mbetur të Hamasit. Detajet janë të njohura për botën.”
Megjithatë, Hamasi ka lënë të kuptohet se përgjigjja e tij nuk do të jetë një “po” pa kushte. Një zyrtar i lartë i Hamasit i tha të përditshmes saudite Asharq se konsultimet janë duke vazhduar dhe nevojitet më shumë kohë para se të lëshohet një përgjigje zyrtare. Sipas tij, Hamasi kërkon ndryshime në disa klauzola.
