Këshilltari i Partisë Demokratike në Këshillin Bashkiak të Tiranës, Ilir Alimehmeti, ka bërë një deklaratë të fortë në emisionin “Oponenca” në News24, duke hedhur dritë mbi një episod të tensionuar brenda radhëve të Partisë Socialiste, lidhur me shkarkimin e kryebashkiakut Erion Veliaj.
Sipas Alimehmetit, gjatë një mbledhjeje me këshilltarët socialistë, kryeministri Edi Rama ka ushtruar presion të fortë mbi ta, duke i “terrorizuar” për të siguruar votën e tyre pro shkarkimit të Veliajt.
“Rama ka përdorur një gjuhë kërcënuese ndaj këshilltarëve të PS-së. U kujtoi një shprehje të viteve më parë për Veliajn, kur tha: ‘Erion Veliaj një ditë do të varet te një nga pemët që ka mbjellë’. Sot, u tha këshilltarëve: ‘Ashtu si ai, ju do të vareni te pylli orbital’ nëse nuk votoni siç duhet,” – u shpreh Alimehmeti.
Deklarata vjen në një moment kur përplasjet brenda Partisë Socialiste dhe raportet mes Ramës dhe Veliajt janë bërë pjesë e diskutimeve publike, ndërsa zhvillimet në Bashkinë e Tiranës po ndiqen me vëmendje nga publiku dhe mediat.
Alimehmeti nuk dha detaje të mëtejshme mbi burimin e informacionit apo reagimin e këshilltarëve socialistë pas mbledhjes, por deklarata e tij ka ngjallur interes dhe debat në rrjetet sociale dhe opinionin publik.
