Australia po shqyrton mundësinë për t’u shitur aksione në rezervën e saj strategjike të mineraleve kritike, përfshirë Britaninë, ndërsa qeveritë perëndimore kërkojnë të ulin varësinë nga Kina për metale të rralla dhe minerale të tjera të rëndësishme për teknologjitë e energjisë së pastër, gjysmëpërçuesit dhe sektorët ushtarakë.
Sipas burimeve të Reuters të njohura me çështjen, aksionet do të jepen në këmbim të një investimi financiar dhe një garancie mbi sasinë e mineraleve që do të përfitohet.
Ata që blejnë aksione do të kenë të drejtën e përfitimit të një përqindjeje të metaleve kritike të rezervës.
Diskutime të avancuara kanë ndodhur me Britaninë, ndërsa interes kanë shfaqur edhe Shtetet e Bashkuara dhe Franca. Franca kishte planifikuar të dërgonte një delegacion për të diskutuar furnizimin me minerale të rralla, por planet janë pezulluar për shkak të qeverisë kalimtare në vend.
Strategjia për krijimin e rezervës u prezantua për herë të parë në një takim teknik të G7 në Çikago më herët këtë muaj, dhe diskutimet vazhdojnë të zhvillohen.
Britania, e cila nuk ka rezervat minerale të Australisë, është veçanërisht e interesuar për aksionet, edhe pse nuk është e qartë se si Kryeministri Keir Starmer mund të lejojë një investim të tillë ndërkombëtar në plan të brendshëm.
Kryeministri australian Anthony Albanese tha për televizionin ABC se Australia ka “të gjitha mineralet që janë në kërkesë, pothuajse të gjithë tabelën periodike”, duke përfshirë litiumin, kobalt, bakrin dhe vanadiumin.
Ai theksoi se krijimi i një rezervë strategjike do t’i japë Australisë një rol kyç në tregjet ndërkombëtare dhe do të ndihmojë në parandalimin e manipulimeve, veçanërisht nga ndërmarrjet shtetërore kineze, duke aluduar gjithashtu për ndikimin e Kinës në sektorin global të mineraleve.
Qeveria australiane ka alokuar 1.2 miliardë dollarë australianë (rreth 793 milionë dollarë amerikanë) për zhvillimin e rezervës strategjike, e cila pritet të jetë funksionale në gjysmën e dytë të vitit 2026.
Albanese theksoi se strategjia nuk ka për qëllim të “japë asgjë askujt, edhe miqve tanë”, por të maksimizojë të ardhurat për Australinë dhe të sigurojë një rol aktiv të vendit në tregjet ndërkombëtare të mineraleve kritike.
Vendimi vjen ndërsa Kina ka vendosur kufizime në eksportin e mineraleve si germaniumi dhe galiumi, dhe ka rregulluar më parë furnizimin me metale të rralla dhe magnete të përhershme, duke dëmtuar zinxhirët e furnizimit për prodhuesit e automobilave në SHBA dhe Evropë.
Australia synon të bëhet një lojtar kyç global në sigurimin e mineraleve kritike, duke ofruar aleatëve një mundësi për të investuar dhe për të siguruar furnizim të qëndrueshëm në sektorë strategjikë.
Ky hap thekson rëndësinë e mineralit kritik për sigurinë industriale dhe teknologjike të Perëndimit, ndërsa aleatët përpiqen të zvogëlojnë ndikimin e tregjeve të kontrolluara nga Kina dhe të mbrojnë zinxhirët e tyre të furnizimit për dekadat e ardhshme.
