Presidenti i SHBA, Donald Trump, pritet të marrë pjesë të martën në një takim me gjeneralë dhe admiralë amerikanë në Quantico, Virginia – një mbledhje e rrallë e udhëheqjes më të lartë ushtarake të vendit në një vend të vetëm, tha një zyrtar amerikan të dielën.
Shtëpia e Bardhë nuk ka dhënë ende një koment mbi këtë zhvillim. The Washington Post raportoi i pari për pjesëmarrjen e presidentit, duke cituar një dokument planifikimi, përcjell Reuters.
Sekretari i Mbrojtjes, Pete Hegseth, pritet të diskutojë mbi nevojën për të respektuar “etos-in e luftëtarit” në të gjitha nivelet e ushtrisë dhe mund të prekë edhe tema të tjera gjatë ngjarjes që pritet të zgjasë rreth një orë, sipas zyrtarëve amerikanë.
Shtetet e Bashkuara kanë trupa të vendosura në mbarë botën, përfshirë në Kore të Jugut, Japoni dhe në Lindjen e Mesme, të komanduara nga gjeneralë dhe admiralë me dy, tre apo katër yje.
Në pothuajse çdo fjalim publik, Hegseth e thekson rëndësinë e “etos-it të luftëtarit” dhe domosdoshmërinë që ushtria amerikane të ketë një mentalitet luftarak.
Ish-prezantuesi i Fox News ka lëvizur me shpejtësi për të riformuar departamentin, duke shkarkuar gjeneralë dhe admiralë të lartë, ndërsa kërkon të zbatojë axhendën e sigurisë kombëtare të Trump dhe të eliminojë iniciativat e diversitetit që ai i konsideron diskriminuese.
