Lëvizja palestineze Hamas ka deklaruar se nuk ka marrë një propozim të ri nga ndërmjetësuesit lidhur me një marrëveshje për armëpushim dhe shkëmbim pengjesh. Sipas një deklarate zyrtare, negociatat kanë qenë të pezulluara që nga tentativa për atentat në Doha.
“Hamas konfirmon gatishmërinë e saj për të shqyrtuar çdo propozim që mund të vijë nga ndërmjetësuesit në mënyrë pozitive dhe të përgjegjshme,” thuhet më tej në deklaratë.
Në një zhvillim të mëtejshëm, një burim i lidhur me Hamasin ka deklaruar për rrjetin Al Jazeera se grupi ka informuar ndërmjetësuesit për pranimin e një propozimi të ri që përfshin çlirimin e 10 pengjeve izraelitë dhe 18 të vdekurve, shpërndarjen e ndihmave humanitare përmes organizatave si Kryqi i Kuq dhe Kombet e Bashkuara, si dhe një armëpushim 60-ditor. Negociatat për përfundimin e luftës do të fillojnë me nisjen e armëpushimit.
Nga ana tjetër, shërbimi i inteligjencës izraelite, Mossad, ka raportuar se Hamas ka refuzuar një propozim të ri për armëpushim, të paraqitur nga drejtori i CIA-s, duke e akuzuar liderin e Hamasit, Yahya Sinwar, për mosinteresim në një marrëveshje humanitare dhe për shfrytëzim të tensioneve me Iranin për të arritur një eskalim të përgjithshëm në rajon, përcjell ynetglobal.
Në një reagim tjetër, Hamas ka akuzuar Kryeministrin izraelit Benjamin Netanyahu për shtimin e kushteve të reja në propozimin për armëpushim, duke penguar kështu përfundimin e një marrëveshjeje. Grupi ka theksuar se këto kushte janë të papranueshme dhe kanë çuar në një bllokim të negociatave.
