Jeta në disa pjesë të Filipineve u ndërpre të hënën, ndërsa autoritetet pezulluan punën dhe familjet u strehuan në qendrat e evakuimit përpara zbarkimit të stuhise më te fortë në botë këtë vit, Ragasa në Luzonin verior.
Sipas shërbimit kombëtar të motit, erëra deri në 215 km/orë dhe shpërthime deri në 265 km/orë u regjistruan që nga ora 8 e mëngjesit sipas orës lokale (0000 GMT).
Paralajmërim për stuhi për Ishujt Babuyan
Autoritetet kanë paralajmëruar për përmbytje të mëdha, rrëshqitje toke dhe ndërprerje të energjisë elektrike. Evakuimet janë duke u zhvilluar në zonat bregdetare dhe të ulëta, dhe dhjetëra fluturime vendase dhe shërbime tragetesh janë anuluar.
Shkollat dhe zyrat qeveritare u mbyllën në rajonin e Manilës dhe në 29 provinca të Filipineve.
Paralajmërimi më i lartë për tajfun u dha për Ishujt e largët Babuyan, ku Ragasa pritet të arrijë në tokë rreth mesditës. Zyrtarët u bënë thirrje banorëve atje të evakuohen në vende më të larta.
“Tani po përjetojmë erëra të forta këtu në veri të Cagayan”, tha për agjencinë e lajmeve AFP shefi i katastrofave provinciale Rueli Rapsing. Ai shtoi se ata ishin të përgatitur për “më të keqen”./DW
