Forcat operacionale të Policisë së Burgjeve zhvilluan një aksion të papritur në Burgun e Sigurisë së Lartë në Peqin, me qëllim identifikimin dhe sekuestrimin e sendeve të ndaluara brenda ambienteve të sigurisë së lartë. Operacioni përfshiu edhe disa të dënuar me burgim të përjetshëm, përfshirë Indrit Shaqen, i cili vuan dënimin për krime të rënda.
Gjatë kontrollit të ushtruar në qelinë e Shaqes, autoritetet gjetën sende të ndaluara, përfshirë telefona celularë, karta SIM dhe pajisje të tjera që mund të shërbenin për komunikim të paligjshëm me botën e jashtme. Një sërë sendesh me interes për hetimet u sekuestruan dhe aktualisht janë në proces verifikimi nga autoritetet përkatëse, raporton BW.
Operacioni vjen si pjesë e masave të shtuara për të rritur sigurinë brenda institucionit dhe për të penguar çdo tentativë për organizim kriminal nga të dënuarit. Po ashtu, nga vetë forcat e sigurisë së IEVP Peqin është ushtruar kontroll dhe është gjetur një telefon i një të dënuari tjetër në seksionin e sigurisë së lartë.
