Presidentja e Komisionit Evropian, Ursula von der Leyen, ka njoftuar sot paketën e 19-të të sanksioneve kundër Rusisë, si përgjigje ndaj përshkallëzimit të vazhdueshëm të agresionit rus kundër Ukrainës dhe shkeljeve të rënda të së drejtës ndërkombëtare.
Në deklaratën e saj, Presidentja theksoi se gjatë muajit të fundit Rusia ka ndërmarrë disa nga sulmet më të mëdha me dronë dhe raketa që nga fillimi i luftës, duke goditur ndërtesa qeveritare dhe banesa civile, përfshirë edhe zyrën e BE-së në Kiev. Ajo theksoi gjithashtu shkeljet e hapësirës ajrore të BE-së nga dronët Shahed në Poloni dhe Rumani, duke i cilësuar këto si prova të qarta se Kremlini nuk kërkon paqe.
Sanksionet e reja përfshijnë:
1. Energjinë:
Ndalim i importeve të gazit natyror të lëngshëm (LNG) nga Rusia në tregjet evropiane.
Ulja e kufirit të çmimit të naftës bruto në 47.6 USD për fuçi.
Sanksionim i 118 anijeve të tjera të përfshira në tregtinë e paligjshme të energjisë, duke çuar totalin në mbi 560 anije të sanksionuara.
Ndalim i plotë transaksionesh me kompanitë kryesore të tregtimit të energjisë: Rosneft dhe Gazpromneft.
Sanksione për rafineritë dhe tregtarët e naftës në vende të treta, përfshirë edhe Kinën.
2. Sistemin financiar:
Ndalim i transaksioneve me banka shtesë në Rusi dhe në vende të treta.
Goditje ndaj platformave të kriptomonedhave për herë të parë, duke ndaluar transaksionet për të penguar shmangien e sanksioneve.
Listim i bankave të huaja të lidhura me sistemet alternative të pagesave ruse.
Kufizime për transaksione në zona ekonomike të posaçme.
3. Teknologjia ushtarake:
Ndalime të reja eksporti për pajisje dhe teknologji që përdoren në fushëbetejë.
Listimi i 45 kompanive në Rusi dhe vende të tjera që mbështesin drejtpërdrejt ose tërthorazi industrinë ushtarake ruse – veçanërisht në sektorin e dronëve.
Presidentja von der Leyen theksoi se sanksionet po japin efekt real në ekonominë ruse: normat e interesit kanë arritur në 17%, inflacioni mbetet i lartë, dhe të ardhurat e Rusisë nga energjia janë ulur ndjeshëm. Ajo bëri të ditur se partnerët ndërkombëtarë raportojnë se kërkesa kryesore e Rusisë në bisedime është lehtësimi i sanksioneve, çka tregon se presioni ekonomik po funksionon.
Një tjetër hap i rëndësishëm është plani i BE-së për të përdorur interesin nga asetet e ngrira ruse për të financuar një “Hua për Dëmshpërblim” për Ukrainën. Asetet nuk do të preken, por të ardhurat e tyre do të përdoren për mbështetje ushtarake dhe rindërtim. Ukraina do ta kthejë këtë hua vetëm pasi Rusia të paguajë dëmshpërblimet që i takojnë.
Bashkimi Evropian po vepron në koordinim të plotë me partnerët e G7-ës, nën drejtimin e presidencës kanadeze, dhe me “Koalicionin e Vullnetarëve”, për të garantuar një përgjigje të fortë dhe të qëndrueshme ndaj agresionit rus.
Presidentja përfundoi deklaratën e saj duke bërë thirrje për miratimin e shpejtë të kësaj pakete nga shtetet anëtare:
“Dëshirojmë që Rusia të largohet nga fusha e betejës dhe të ulet në tryezën e bisedimeve me Ukrainën për një paqe të drejtë dhe të qëndrueshme.”
