Në Shtëpinë e Bardhë të mërkurën, përfaqësues të familjeve të të rrëmbyerve dhe ish-të kapurve u takuan me presidentin amerikan Donald Trump, i cili ripërsëriti përkushtimin e tij për sigurimin e lirimit të 48 personave të mbajtur peng nga grupi Hamas, përcjell YNetNews.
Në takim morën pjesë Ilay dhe Yeela David, vëllezër dhe motra të të rrëmbyerit Evyatar David, si dhe ish-të kapurit Ohad dhe Raz Ben Ami, së bashku me Zëvendëspresidentin J.D. Vance, Sekretarin e Shtetit Marco Rubio, Sekretarin e Mbrojtjes Pete Hegseth dhe përfaqësuesin special Steve Waitkoff.
Trump theksoi rëndësinë e bashkimit të udhëheqësve më të lartë të SHBA-së për të treguar përkushtimin e vendit në çështjen e lirimit të të rrëmbyerve, duke thënë se administrata e tij “po punon shumë” për t’i sjellë ata në shtëpi. Kur Trump pyeti nëse presioni ushtarak do të ndihmonte, familjet shprehën shqetësimin se kjo mund të rrezikonte jetën e të kapurve dhe kërkuan një armëpushim, të cilin Trump e mbështeti si zgjidhjen e vetme të mundshme.
Ilay David, vëllai i Evyatar David, tha pas takimit: “Presidenti na premtoi se po punon për sigurimin e një marrëveshjeje që të shpëtojë pengjet dhe t’i sjellë në shtëpi. I falënderojmë dhe besojmë në përpjekjet e tij.”
Ish-i kapuri Ohad Ben Ami shtoi: “Presidenti Trump shprehu angazhimin e tij të pakursyer për të vazhduar përpjekjet për lirimin e të gjithë pengjeve sa më shpejt. I falënderojmë për lirimin tonë dhe shpresojmë që të gjithë 48 të rrëmbyerit të lirohen shpejt.”
