Polonia është më afër luftës se kurrë më parë që nga Lufta e Dytë Botërore, tha kryeministri Donald Tusk të mërkurën pasi shteti anëtar i NATO-s rrëzoi dronë rusë mbi territorin e tij.
Ai tha se Polonia i kishte kërkuar NATO-s të niste këshillime sipas Nenit 4 të traktatit të aleancës, i cili thotë se anëtarët e aleancës ushtarake perëndimore do këshillohen së bashku sa herë që, sipas mendimit të ndonjërit prej tyre, territori, pavarësia politike ose siguria e ndonjërit prej tyre kërcënohet.
Tusk i tha parlamentit se kishte pasur 19 ndërhyrje në hapësirën ajrore polake gjatë natës. Inkursionet rritën tensionet që tashmë po zienin pas inkursioneve të mëparshme nga dronë.
“Nuk kam arsye të pretendoj se jemi në prag të luftës, por është kaluar një vijë dhe është pakrahasueshëm më e rrezikshme se më parë”, tha ai.
“Kjo gjendje na afron më shumë me luftën sesa ka ndodhur ndonjëherë që nga Lufta e Dytë Botërore”.
Tusk tha se rrëzimi i tre dronëve ishte konfirmuar dhe ka të ngjarë që të jetë rrëzuar edhe një i katërt, shkruan Reuters.
“Fakti që këto dronë, të cilët përbënin një kërcënim për sigurinë, u rrëzuan, ndryshon gjendjen politike. Prandaj, këshillimet aleate morën formën e një kërkese zyrtare për të aktivizuar Nenin 4 të Traktatit të NATO-s”, tha Tusk.
Zëdhënësja e Ministrisë së Brendshme Karolina Galecka tha se Polonia kishte gjetur shtatë dronë dhe mbeturina nga një raketë.
Një dron ose objekt i ngjashëm goditi një ndërtesë banimi në Wyryki në Poloninë lindore, por askush nuk u lëndua, tha kryebashkiaku lokal për kanalin shtetëror të lajmeve TVP Info.
Diku tjetër në rajonin lindor të Lublinit, policia tha se gjeti një dron të dëmtuar në fshatin Czosnowka.
Në rajonin qendror të Lodzit, një dron u gjet në një fushë pranë fshatit Mniszkow.
