Katër pjesëtarë të ekuipazhit të një tanku u vranë të hënën herët në një sulm guerilas të Hamasit ndaj një postblloku ushtarak në qytetin e Gazës, tha IDF, në një nga incidentet më vdekjeprurëse për trupat Izraelit në javët e luftimeve urbane.
Ushtria identifikoi tre nga ushtarët e vrarë si Rreshteri Uri Lamed, 20 vjeç, Rreshteri Gadi Cotal, 20 vjeç dhe Rreshteri Amit Arye Regev, 19 vjeç. Të gjithë shërbenin në Batalionin e 52-të të Brigadës së 401-të të Blinduar të rregullt. Emri i ushtarit të katërt nuk është publikuar ende.
Sipas ushtrisë, katër luftëtarë të Hamasit nisën sulmin rreth orës 6 të mëngjesit pranë një pike të paracaktuar midis Jabaliya dhe lagjes Sheikh Radëan në skajin verior të qytetit të Gazës. Ata hodhën një pajisje shpërthyese në një tank të pozicionuar në hyrje, duke i vënë flakën dhe duke vrarë të gjithë ekuipazhin brenda. Ata gjithashtu hapën zjarr ndaj komandantit të tankut, shkruan Ynet.
Ushtarët brenda pozicionit ishin në gatishmëri në agim, pasi ishin kthyer më pak se një orë më parë nga një bastisje nate. Ata iu kundërpërgjigjën zjarrit, duke vrarë të paktën një sulmues, ndërsa të tjerë me sa duket ikën. Ushtria tha se një këmbësor i Nahal u plagos lehtë.
Trupat po kontrollonin zonën për t’u siguruar që nuk ishin vendosur eksplozivë të tjerë dhe për të gjetur trupat e sulmuesve. Një hetim paraprak tregoi se nuk kishte asnjë përpjekje për të rrëmbyer ushtarë, por komandantët po shqyrtonin nëse terroristët ishin infiltruar përmes një tuneli të pazbuluar.
Hamasi ka shtuar sulme të tilla ndaj posteve izraelite në Rripin e Gazës në javët e fundit, me sa duket duke synuar të shfrytëzojë lodhjen midis ushtarëve në vijën e parë. Ushtria tha se terroristët po përpiqen të kryejnë sulme të tilla guerile afërsisht një herë në javë, shumica e të cilave janë zmbrapsur.
Ministri i Mbrojtjes, Israel Katz, tha në një postim në X se Izraeli po shtonte operacionet.
“Sot një uragan i fuqishëm do godasë Qytetin e Gazës dhe çatitë e kullave të terrorit do dridhen”, shkroi ai. Katz paralajmëroi udhëheqësit e Hamasit si në Gaza ashtu edhe jashtë saj që të lironin pengjet dhe të dorëzoheshin.
“Përndryshe Gaza do shkatërrohet dhe ju do eliminoheni”, tha ai, duke shtuar se ushtria po përgatitej të zgjeronte manovrën e saj për të “mposhtur me vendosmëri Gazën”.
