Kryeministri i Izraelit, Benjamin Netanyahu, ka reaguar ashpër pas sulmit të ndodhur mëngjesin e së hënës në pikën e autobusëve në lagjen Ramot të Jeruzalemit, ku dy sulmues palestinezë qëlluan mbi civilë, duke lënë gjashtë të vrarë dhe dhjetëra të plagosur. Në një deklaratë të bërë nga një bunker i Forcave Ajrore, Netanyahu tha se neutralizimi i dy terroristëve nuk është i mjaftueshëm dhe se Izraeli do të ndërmarrë veprime më të gjera dhe më të ashpra ndaj atyre që ai i cilësoi si “fole terrori”, përcjell YNetNews.
“Eliminimi i këtyre dy terroristëve nuk është i mjaftueshëm. Nuk mjafton as të shkojmë pas përkrahësve dhe bashkëpunëtorëve të tyre. Urdhri im është i qartë: të godasim fuqishëm foletë e terrorit,” deklaroi Netanyahu. Ai bëri të ditur se Izraeli ka kryer tashmë operacione të tilla në tre kampe refugjatësh, ku sipas tij, popullsia u evakuua dhe e gjithë infrastruktura terroriste u shkatërrua. Kryeministri izraelit shtoi se kjo qasje do të vazhdojë edhe në zona të tjera.
Në vijim të deklaratës, Netanyahu iu referua bombardimeve të ndërtesave shumëkatëshe në qytetin e Gazës, duke i quajtur ato një “parathënie” të një operacioni më të madh. “Kjo është vetëm hyrja. Prandaj u them banorëve të Gazës: jeni paralajmëruar, largohuni nga aty,” tha ai, duke sinjalizuar një shkallëzim të mundshëm të operacioneve ushtarake në territorin palestinez.
Pas sulmit në Ramot, forcat izraelite rrethuan disa lagje palestineze në Bregun Perëndimor dhe kryen një sërë bastisjesh, në kërkim të personave të dyshuar si bashkëpunëtorë të sulmuesve apo të lidhur me grupe militante. Ndërkohë, grupet palestineze kanë paralajmëruar hakmarrje për humbjet e civilëve në Gaza dhe për, siç e quajnë ata, agresionin sistematik të Izraelit në territoret palestineze.
Tensionet në rajon janë rritur ndjeshëm, ndërsa komuniteti ndërkombëtar ka bërë thirrje për përmbajtje. Megjithatë, deklaratat e Netanyahu-t tregojnë se Izraeli është i vendosur të thellojë më tej ofensivën e tij kundër atyre që i konsideron kërcënime të drejtpërdrejta për sigurinë kombëtare.
