Në vendin e biergarten dhe Oktoberfest, birra tashmë po konsumohet gjithnjë e më shumë nga të huajt, jo nga gjermanët
Mjafton të mendosh për një gjerman që po argëtohet, dhe me shumë gjasa do të të shfaqet para syve një djalosh ose vajzë faqekuqe, veshur me Lederhosen ose Dirndl, që mban gjashtë gota gjigante birre të mbushura plot.
Kjo përtej faktit që, siç do të të kujtojë me shpejtësi pjesa tjetër e Gjermanisë, rajoni i Bavarisë shërben si një sinonim për të gjithë vendin.
Problemi i vërtetë me këtë imazh është se gjermanët po humbasin shijen për pijen që dikur i përcaktonte, shkruan The Economist.
Më 1 gusht, Zyra e Statistikave e Gjermanisë njoftoi se në gjashtëmujorin e parë të vitit 2025, shitjet e birrës ranë nën 4 miliardë litra për herë të parë që nga fillimi i regjistrimit të të dhënave në vitin 1993.
Në vitin 2005, një gjerman mesatar konsumonte 112 litra të kësaj pije. Sot shifra është më pak se 90.
Gjermania mbetet tregu i gjashtë më i madh i birrës në botë. Por ndërsa dikur gjermanët pinin më shumë se çdo komb tjetër, përveç çekëve, tani janë në vendin e tetë në renditjen për person.
Për fat të keq, rënia po përshpejtohet. “Paniku” ka kapluar disa fabrika birre, thotë konsulenti Gerrit Blümelhuber.
Disa nga shkaktarët dihen: popullsia e Gjermanisë po plaket dhe të rinjtë janë më pak të dhënë pas alkoolit.
Disa fajësojnë çmimin, megjithëse kjo duket e vështirë për t’u justifikuar kur në raftet e supermarketeve gjen arka me Paulaner për 15 euro (17,40 dollarë).
Vështirësitë në hotele dhe restorante tregojnë për një problem më të gjerë në industrinë e mikpritjes.
E megjithatë, rënia e konsumit të verës është shumë më e butë.
“Ekziston një etje e dukshme për birrë në Gjermani”, – thotë Volker Kuhl, CEO i fabrikës së birrës C&A Veltins, por “nuk ka një dëshirë për të pirë gotën e tretë apo të katërt”.
Nëse ka një dritë shprese, është sektori në rritje i birrës pa alkool, i cili tani përbën pothuajse një të dhjetën e prodhimit total të birrës në Gjermani (edhe pse përjashtohet nga statistikat zyrtare).
Tashmë, një Biergarten që nuk ofron birrë pa alkool është një ngjarje e rrallë.
Vitin e kaluar në Mynih u hap i pari i posaçëm vetëm për birrat pa alkool.
Mjeshtrit e birrës, ndonjëherë të përmbajtur, po provojnë teknika të reja, si përdorimi i majave të egra që nuk fermentojnë gjithë sheqerin gjatë procesit të prodhimit.
Por ligji historik i pastërtisë (Reinheitsgebot), që kufizon atë që mund të shitet si birrë, nuk është gjithmonë një ftesë për inovacion, paralajmëron Markus Raupach nga Akademia Gjermane e Birrës.
Edhe në parashikimet më optimiste, birra pa alkool nuk mund të kompensojë aspak rënien e versionit me alkool.
As eksportet nuk mund ta bëjnë këtë, pasi ato po bien edhe më shpejt se shitjet vendase dhe tani përballen me tarifat e Donald Trump.
Pothuajse 100 fabrika birre gjermane janë mbyllur gjatë pesë viteve të fundit; të tjera me siguri do të kenë të njëjtin fat. Një perspektivë vërtet tronditëse./Monitor
