Administrata e Presidentit Donald Trump tha të premten se po shqyrton nëse qeveria federale mund të marrë kontrollin e memorialit dhe muzeut të 11 shtatorit në qytetin e Nju Jorkut.
Vendndodhja në Manhattanin e poshtëm, ku kullat binjake të Qendrës Botërore të Tregtisë u shkatërruan nga avionë të rrëmbyer më 11 shtator 2001 , përmban dy pishina përkujtimore të rrethuara nga ujëvara dhe parapete me emrat e të vdekurve, si dhe një muze nëntokësor.
Që nga hapja për publikun në vitin 2014, sheshi përkujtimor dhe muzeu janë drejtuar nga një organizatë bamirëse publike, e cila tani kryesohet nga ish-kryetari i bashkisë së New York-ut, Michael Bloomberg, një kritik i shpeshtë i Trump, shkruan AP.
Shtëpia e Bardhë konfirmoi se administrata ka pasur “diskutime paraprake eksploruese” rreth idesë, por nuk pranoi të jepte hollësi. Zyra vuri në dukje se republikani u zotua gjatë fushatës së tij të vitit të kaluar ta bënte vendin një monument kombëtar, të mbrojtur dhe të mirëmbajtur nga qeveria federale.
Por zyrtarët në Memorialin dhe Muzeun Kombëtar të 11 Shtatorit thonë se qeveria federale, sipas ligjeve aktuale, nuk mund ta marrë në mënyrë të njëanshme vendin, i cili ndodhet në tokë në pronësi të Autoritetit Portual të Nju Jorkut dhe Nju Xhersit.
Që qeveria amerikane të marrë përsipër kostot dhe menaxhimin e vendit gjithashtu “nuk ka kuptim”, duke pasur parasysh përpjekjet e Trump për të zvogëluar në mënyrë dramatike burokracinë federale, tha Beth Hillman, presidente dhe drejtoreshë ekzekutive e organizatës.
