Florida planifikon të bëhet shteti i parë që i jep fund të gjitha detyrimeve për vaksinim, përfshirë edhe për fëmijët e shkollës, duke hedhur poshtë një praktikë që ekspertët e shëndetit publik e kanë përdorur për dekada me kufizimin e përhapjes së sëmundjeve infektive.
Dr. Joseph A. Ladapo, kirurgu i përgjithshëm i Floridës, bëri njoftimin të mërkurën së bashku me Guvernatorin Ron DeSantis, një republikan.
DeSantis u bë i famshëm në nivel kombëtar gjatë pandemisë së koronavirusit dhe me kalimin e kohës ai ka përqafuar pikëpamje gjithnjë e më shumë kundër vaksinimit.
“Kush jam unë që t’ju them se çfarë duhet të fusë fëmija juaj në trup?” tha Dr. Ladapo, një denigrues i zëshëm i vaksinave, i cili u duartrokit gjatë një takimi të mërkurën në Valrico, Florida, pranë Tampas. “Trupi juaj është një dhuratë nga Zoti.”
Ai shtoi se administrata do “punojë për t’i dhënë fund” të gjitha mandateve të vaksinimit.
Dr. Ladapo është përballur me kritika të përsëritura nga të tjerë në fushën e tij për qëndrimet e tij mbi shëndetin publik. Ai i lejoi prindërit të zgjidhnin nëse do t’i dërgonin fëmijët e pavaksinuar në shkollë gjatë një shpërthimi të fruthit në Weston, Florida, në vitin 2024, duke hedhur poshtë udhëzimet e shëndetit publik.
Nuk është e qartë se si mund të duket procesi i anulimit të urdhrave të vaksinimit të shtetit. Dr. Ladapo tha se Departamenti i Shëndetësisë i Floridës, agjencia që ai mbikëqyr, do hiqte rregullat që shpallin detyrimet e vaksinimit. Ligjvënësit shtetërorë “do duhet të marrin vendime” gjithashtu, tha Dr. Ladapo.
Të 50 shtetet kanë të paktën disa kërkesa për vaksinim për fëmijët që hyjnë në shkollë, megjithëse të gjitha lejojnë përjashtime mjekësore, dhe shumica lejojnë përjashtime për arsye fetare ose personale. Numri i studentëve që marrin përjashtime është rritur vitet e fundit, dhe normat e imunizimit kanë rënë, sipas KFF, një grup kërkimor për politikat shëndetësore.
DeSantis, i cili emëroi Dr. Ladapo si kirurg të përgjithshëm në vitin 2021, njoftoi gjithashtu krijimin e një komisioni për të përafruar Floridën me qëllimet e përcaktuara nga Robert F. Kennedy Jr., Sekretari i Shëndetësisë i Presidentit Trump dhe një skeptik i hapur ndaj vaksinave. Komisioni do drejtohet nga Casey DeSantis, gruaja e guvernatorit.
“Ne kemi bërë shumë tashmë,” tha DeSantis.
“Nuk mendoj se ndonjë shtet i është afruar as edhe asaj që ka bërë Florida.”
Por, shtoi ai, “ne duam të qëndrojmë përpara të tjerëve”.
VINI RE: Ky material është pronësi intelektuale e NY Times
