Presidenti rus Vladimir Putin u takua më 2 shtator në Pekin me kryeministrin e Sllovakisë, Robert Fico, ku diskutuan për luftën në Ukrainë, marrëdhëniet me Perëndimin dhe bashkëpunimin ekonomik, raporton Kyiv Indipendent.
Putin i kërkoi vendeve të Europës Lindore që të ndërpresin furnizimet me gaz dhe energji elektrike për Ukrainën, duke thënë: “Ukraina merr burime të rëndësishme energjie përmes fqinjëve të saj. Ndërpritini furnizimet me gaz, preini furnizimet me energji elektrike, dhe ata menjëherë do të kuptojnë se ka kufij për sjelljen e tyre.”
Ai akuzoi Kievin për sulme ndaj infrastrukturës energjetike ruse dhe shtoi: “Ne nuk kemi marrë masa kundër infrastrukturës civile për një kohë të gjatë, sidomos në periudhën e dimrit. Pasi ata nisën sulmet, ne filluam të përgjigjemi seriozisht.”
Këto deklarata bien ndesh me realitetin e dokumentuar, pasi gjatë vitit 2024 Rusia kreu të paktën 13 sulme masive me dronë dhe raketa ndaj rrjetit energjetik të Ukrainës, duke shkaktuar ndërprerje të gjera të energjisë. Vetëm disa ditë më parë, sulmet ruse në rajonin e Odesës lanë pa energji mbi 29 mijë konsumatorë.
Nga ana e tij, Fico theksoi se Sllovakia dëshiron të “standardizojë” marrëdhëniet me Moskën dhe se dy vendet “duhet të kërkojnë mundësi për të thelluar dhe zgjeruar bashkëpunimin.”
Ai tha gjithashtu se gjatë takimit me presidentin Volodymyr Zelensky më vonë këtë javë, do të ngrejë çështjen e “papranueshmërisë së sulmeve ndaj infrastrukturës energjetike”, duke iu referuar goditjeve ukrainase në tubacionin e naftës Druzhba, që mbetet një hallkë jetike për furnizimin e Hungarisë dhe Sllovakisë me naftë ruse.
Putin e vlerësoi qëndrimin e Bratislavës, duke e quajtur atë një politikë të jashtme “të pavarur” që jep “rezultate pozitive.”
Që nga rikthimi në pushtet në vitin 2023, Fico ka ndaluar dërgimin e ndihmave ushtarake për Kievin dhe ka vënë në pikëpyetje sanksionet e BE-së ndaj Moskës, qëndrime që kanë shkaktuar kritika nga Ukraina dhe Brukseli.
Takimi në Pekin erdhi ndërsa Fico po merr pjesë në ceremonitë përkujtimore për kapitullimin e Japonisë në Luftën e Dytë Botërore, duke e bërë Sllovakinë vendin e vetëm të BE-së të përfaqësuar në këtë ngjarje.
