Kryeministri izraelit, Benjamin Netanyahu, ka refuzuar të mbajë një votim mbi marrëveshjen e propozuar për lirimin e pengjeve gjatë një mbledhjeje të tensionuar të kabinetit, e cila zgjati deri në orët e hershme të së hënës.
Sipas mediave hebreje, Netanyahu argumentoi se “një marrëveshje e pjesshme nuk është relevante” dhe përmendi se presidenti amerikan Donald Trump e kishte këshilluar të mos pranonte një marrëveshje të pjesshme.
Shefi i Shtabit të IDF, Gjeneralmajor Eyal Zamir, dhe disa ministra të kabinetit kishin kërkuar shqyrtimin e marrëveshjes, duke theksuar se “ka një kornizë mbi tryezë; ne duhet ta marrim atë”.
Zamir gjithashtu tha se ofensiva e IDF, e quajtur “Operation Gideon’s Chariots”, kishte krijuar kushtet për kthimin e pengjeve dhe se forcat izraelite ishin të gatshme të rifillonin sulmet nëse marrëveshja nuk sillte një zgjidhje të përhershme pas armëpushimit 60-ditor.
Ministri i Jashtëm Gideon Sa’ar dhe Ministrja e Inteligjencës Gila Gamliel mbështetën gjithashtu marrëveshjen, duke përmendur sfidat diplomatike përballë njohjes së shtetit palestinez nga aleatë perëndimorë.
Megjithatë, ministrat e ekstremit të djathtë, Itamar Ben Gvir dhe Bezalel Smotrich, insistuan që Netanyahu të organizonte një votim për të refuzuar marrëveshjen, duke e quajtur atë të papranueshme.
Kryeministri u përgjigj: “Nuk ka nevojë për votim; nuk është në tryezë.”
Marrëveshja e propozuar, e pranuar nga Hamas më 18 gusht, parashikonte lirimin e 10 pengjeve të gjalla dhe kthimin e mbetjeve të 18 të vrarëve në këmbim të lirimit të qindra të burgosurve palestinezë dhe një armëpushimi 60-ditor, gjatë të cilit do të zhvilloheshin negociata për lirimin e pengjeve të mbetura dhe për mbarimin e përhershëm të luftës.
Netanyahu theksoi se tërheqja nga territoret e kapura gjatë operacionit “Gideon’s Chariots” do të ishte një “çmim i rëndë” dhe se mbështetja diplomatike e Izraelit, duke përfshirë atë nga SHBA-ja, “nuk është e pakufizuar”.
