Hungaria ka vendosur sanksione ndaj komandantit të Forcave të Sistemeve të Paaftësuara të Ukrainës, Robert Brovdi, pas tre sulmeve të njëpasnjëshme ndaj tubacionit të naftës “Druzhba” në territorin rus, të cilat përkohësisht ndaluan furnizimin me naftë drejt Hungarisë dhe Sllovakisë.
Ministri i Jashtëm hungarez, Péter Szijjártó, e konsideroi këtë veprim si një kërcënim për sovranitetin kombëtar, përcjell Euronews.
“Ne kemi vendosur të ndalojmë hyrjen e komandantit të njësisë ushtarake që kreu sulmet jashtëzakonisht serioze ndaj tubacionit ‘Miqësia’ nga Hungaria dhe nga i gjithë territori Schengen,” deklaroi Szijjártó.
“Ky shtetas ukrainas nuk do të lejohet të hyjë në Hungari apo në zonën Schengen për disa vite.”
Ky ndalim e pengon Brovdi-n të marrë pjesë edhe në takime të rëndësishme të NATO-s në territorin europian. Ai ishte i pranishëm në qershor në takimin LANDEURO në bazën ushtarake të NATO-s në Wiesbaden, Gjermani.
Reagimi i Kievit erdhi menjëherë. Ministri i Jashtëm ukrainas, Andrii Sybiha, e cilësoi deklaratën e homologut hungarez si të papranueshme dhe paralajmëroi masa reciproke: “Peter, nëse tubacioni rus është më i rëndësishëm për ty sesa fëmijët ukrainas të vrarë nga Rusia këtë mëngjes, kjo është degradim moral. Hungaria është në anën e gabuar të historisë. Ne do të marrim masa pasqyre.”
Ndërkohë, këshilltari politik i kryeministrit hungarez, Balázs Orbán, konfirmoi për mediat lokale se sanksionet lidhen drejtpërdrejt me Brovdi-n.
Ky i fundit, i njohur me nofkën “Magyar”, që në hungarisht do të thotë “hungarez”, kishte pranuar më herët në rrjetet sociale se njësitë e tij ishin përgjegjëse për sulmet ndaj tubacionit.
Në një postim në Telegram pas shpërthimeve, ai kishte shkruar: “Rusët, shkoni në shtëpi.”
Komisioni Europian ka sqaruar se, megjithëse sulmet nuk kanë rrezikuar rezervat strategjike të naftës në Hungari dhe Sllovaki, vendet anëtare të Schengen-it kanë të drejtë të vendosin ndalim hyrjeje nëse e konsiderojnë dikë kërcënim për sigurinë kombëtare.
Ky ndalim mund të sfidohet ligjërisht dhe, në raste të veçanta humanitare, autoritetet vendase mund të japin përjashtime.
