Li Chenggang është ndihmësi kryesor i negociatorit kryesor të Pekinit
Një negociator i lartë tregtar kinez do shkojë në Uashington këtë javë për atë që pritet të jetë dialogu i parë në kryeqytetin e SHBA-së, sipas njerëzve të njohur me çështjen, pasi të dyja palët kërkojnë të krijojnë komunikim të rregullt gjatë një armëpushimi të zgjatur tarifor.
Li Chenggang, ndihmësi kryesor i negociatorit kryesor të Pekinit, He Lifeng, do takohet me zëvendësit e Përfaqësuesit të Tregtisë së SHBA-së, Jamieson Greer, dhe zyrtarë në Departamentin e Thesarit më vonë këtë javë, thanë burimet. Li do takohet gjithashtu me përfaqësues të komunitetit të biznesit të SHBA-së.
Diskutimet vijnë ndërsa SHBA-të dhe Kina kanë zgjatur pauzën e tyre për tarifat më të larta deri në fillim të nëntorit. Armëpushimi u sigurua pasi të dy palët ranë dakord të tërhiqnin rritjen e tarifave dhe të lehtësonin kufizimet e eksportit për mallrat kryesore, duke përfshirë magnetet e rralla nga Kina, të cilat janë jetike për shumë prodhime industriale dhe prodhime të caktuara teknologjike nga SHBA-të.
Administrata Trump kohët e fundit ka moderuar tonin e saj konfrontues ndaj Pekinit, ndërsa presidenti Trump është gjithnjë e më i përqendruar në përpjekjen për të arritur një marrëveshje ekonomike me Kinën, një marrëveshje që synon të hapë gjigantin aziatik për më shumë biznes dhe teknologji amerikane. Zyrtarë të lartë nga të dy vendet në muajt e fundit kanë qenë gjithashtu në bisedime mbi një samit të mundshëm midis Trump dhe udhëheqësit kinez Xi Jinping.
Duke folur me gazetarët të hënën, ndërsa u takua me presidentin e Koresë së Jugut Lee Jae Myung në Uashington, Trump tha se po shqyrton një udhëtim në Kinë, ndërsa të dy vendet vijojnë negociatat tregtare.
“Në një moment, ndoshta gjatë këtij viti ose menjëherë pas kësaj, ne do shkojmë në Kinë”, tha presidenti i SHBA-së.
“Do kemi një marrëdhënie të shkëlqyer me Kinën”.
Megjithatë, tensionet tregtare po ziejnë midis dy fuqive ekonomike të botës.
Më parë këtë muaj, Trump i bëri thirrje Kinës të rrisë ndjeshëm blerjet e saj të sojës amerikane – një kërkesë që deri më tani nuk ka marrë përgjigje, me Pekinin që ende nuk ka blerë asnjë ngarkesë nga korrja që fillon në shtator. Ndërkohë, administrata po përgatitet të shtojë kontrollin e importeve kineze të çelikut, bakrit dhe litiumit, në një veprim që synon të zbatojë një ndalim të SHBA-së për mallrat që dyshohet se janë prodhuar me punë të detyruar në rajonin e Xinjiang dhe të përputhet me qëllimet më të gjera të Trump për të ulur deficitin tregtar që SHBA-të kanë me Kinën.
Sekretari i Thesarit i SHBA-së, Scott Bessent, tha se bisedimet dyditore tregtare me Kinën ishin shumë konstruktive dhe se vendimi përfundimtar për zgjatjen i takon presidentit Trump. Foto: Magnus Lejhall/AFP/Getty Images
Në bisedimet e kësaj jave, negociatori Li pritet të diskutojë blerjet e sojës. Li, tashmë zëvendësministër i Tregtisë dhe ish-i dërguar kinez në Organizatën Botërore të Tregtisë, ka vite përvojë në përdorimin e rregullave të tregtisë globale për t’iu kundërvënë SHBA-së. Disa amerikanë që janë ulur përballë tij në negociata e quajnë atë një negociator të ashpër, por efektiv.
Para se të marrë ndonjë angazhim për të blerë artikuj të tillë si soja ose aeroplanët Boeing, Pekini do vijojë të kërkojë që administrata Trump të heqë tarifat prej 20% të lidhura me tregtinë e fentanilit, sipas njerëzve të njohur me çështjen.
Megjithatë, deri më tani, thanë njerëzit, Kina ende nuk ka ofruar një propozim për frenimin e trafikimit të përbërësve të fentanilit që administrata Trump e konsideron të mjaftueshëm.
Li pritet gjithashtu të vazhdojë të nxisë administratën Trump të lehtësojë kufizimet në shitjet e teknologjisë në Kinë, thanë njerëzit, megjithëse deri më tani, ai nuk ka pasur ndonjë takim të planifikuar me Departamentin e Tregtisë, i cili mbikëqyr kontrollet e eksportit.
Vendimi i administratës në korrik për të hequr një ndalim mbi shitjet e gjysmëpërçuesve H20 të Nvidia-s në Kinë ka ngjallur debat në Uashington se si të ekuilibrohen interesat tregtare të kompanive amerikane me shqetësimet e sigurisë kombëtare. Disa analistë e kanë vënë në pikëpyetje vendimin, duke argumentuar se ai vendos një precedent të rrezikshëm duke lejuar që kontrollet e eksportit të përdoren si një mjet negociues.
Shumë drejtues biznesi në SHBA besojnë se mbetet thelbësore që Uashingtoni dhe Pekini të përfshihen në diskutime kuptimplote rreth politikave ekonomike dhe industriale të Kinës, të cilat, sipas tyre, kanë shtrembëruar prej kohësh tregjet globale dhe kanë penguar konkurrencën e drejtë.
“Jemi shumë të inkurajuar që të shohim të dyja palët të angazhohen në negociata të drejtpërdrejta”, tha Sean Stein, president i Këshillit të Biznesit SHBA-Kinë, i cili përfaqëson mbi 270 kompani amerikane që bëjnë biznes në Kinë.
“Ka mundësi që të dyja palët të bëjnë përparim në çështje kritike që shtrihen përtej tarifave dhe kontrolleve të eksportit në çështje më të gjera tregtare.”
VINI RE: Ky material është pronësi intelektuale e WSJ
Përgatiti për Hashtag.al, Klodian Manjani
