Presidenti sirian Ahmad al-Sharaa tha se Damasku po zhvillon “diskutime të avancuara” mbi një marrëveshje të mundshme sigurie me Izraelin, por theksoi se çdo marrëveshje do të bazohet vetëm në linjat e armëpushimit të vitit 1974. Komentet e tij erdhën gjatë një takimi me figura të mediave arabe dhe ish-ministra të informacionit, sipas raporteve siriane.
Ish-Ministri jordanez i Informacionit, Samih al-Maaytah, i cili mori pjesë në takim, shkroi më vonë në gazetën Al-Rai të Jordanisë se al-Sharaa shfaqi “shumë realizëm” në adresimin e sfidave qendrore të Sirisë. Ai shtoi se toni i presidentit sirian nuk ishte ai i “një komandanti të një fraksioni islamist që i përmbahet një interpretimi të rreptë të teksteve fetare”, por më tepër i një udhëheqësi që e vendos “Sirinë në vend të parë”.
Këto komente u bënë të ditura ndërsa kryeministri Benjamin Netanyahu u takua të dielën në Jerusalem me të dërguarin special të SHBA-së për Sirinë dhe Libanin, Thomas Barrack , në kuadër të përpjekjeve të Uashingtonit për të ndërmjetësuar një kuadër sigurie që përfshin Izraelin, Sirinë dhe Libanin. Në takim morën pjesë gjithashtu ish-e dërguara e SHBA-së Morgan Ortagus, këshilltari izraelit për sigurinë kombëtare, Tzachi Hanegbi, dhe ambasadori i SHBA-së në Izrael, Mike Huckabee, raporton Ynet.
Barrack ka ndërmjetësuar midis Jerusalemit dhe Damaskut, ndërkohë që i ka bërë presion qeverisë së Libanit për të çarmatosur Hezbollahun dhe grupet e tjera të armatosura. Në takim, ai ngriti kërkesat e SHBA-së që Izraeli të zvogëlojë sulmet ndaj infrastrukturës së Hezbollahut dhe të tërhiqet nga pesë pika përgjatë kufirit ku forcat izraelite janë të vendosura brenda territorit libanez.
