Presidenti ukrainas Volodymyr Zelenskyy do të udhëtojë të hënën drejt Uashingtonit për një takim të rëndësishëm me Presidentin amerikan, Donald Trump, ku do ta shoqërojnë liderë të lartë europianë, përcjell Fox News.
Të dielën, Sekretari i Përgjithshëm i NATO-s, Mark Rutte, Presidentja e Komisionit Evropian, Ursula von der Leyen, Presidenti francez, Emmanuel Macron, Kryeministri britanik, Keir Starmer, Kancelari gjerman, Friedrich Merz, Kryeministrja italiane, Giorgia Meloni, dhe Presidenti finlandez, Alexander Stubb, konfirmuan pjesëmarrjen e tyre. Ky prezencë e përbashkët synon të tregojë vendosmërinë e Evropës për të mbështetur Ukrainën ndërsa lufta e Rusisë vazhdon.
Para udhëtimit për në Uashington, Zelenskyy u takua me Von der Leyen në Bruksel për të vendosur prioritetet e diskutimeve në Shtëpinë e Bardhë, duke përqendruar vëmendjen te ndihma ushtarake afatgjatë, ambiciet e Ukrainës për anëtarësim në BE dhe forcimi i solidaritetit transatlantik kundër agresionit rus.
Në një konferencë të përbashkët për shtyp, Von der Leyen theksoi: “Do të vazhdojmë t’ju mbështesim për aq kohë sa të nevojitet,” dhe mbështeti një takim trilateral midis Ukrainës, Rusisë dhe Shteteve të Bashkuara. Ajo paralajmëroi se BE-ja do të lëshojë muajin e ardhshëm paketën e 19-të të sanksioneve kundër Rusisë nëse Kremlini nuk ndalon luftën në Ukrainë.
Zelenskyy deklaroi se shpreson që takimi me Trump të jetë produktive dhe jo një përsëritje e debatit të ashpër që pati në Zyrën Ovale gjatë vizitës së tij të shkurtit. Ai dhe liderët europianë refuzojnë vazhdimisht çdo propozim për t’i dhënë territor ukrainas Rusisë.
“Çështja territoriale është kaq e rëndësishme, sa duhet të diskutohet vetëm nga liderët e Ukrainës dhe Rusisë në kuadër të një takimi trilateral Ukrainë-SHBA-Rusi,” tha Zelenskyy, duke shtuar se deri tani Rusia nuk ka dhënë shenja se takimi trilateral do të zhvillohet.
