Kryeministri izraelit Benjamin Netanyahu mbrojti planin për marrjen ushtarake të Qytetit të Gazës, pavarësisht reagimeve të ashpra ndërkombëtare. Zyrtarët e Kombeve të Bashkuara paralajmëruan se ky veprim mund të shkaktojë një “katastrofë tjetër” .
Në një konferencë të rrallë për shtyp me mediat ndërkombëtare, Netanyahu u shpreh se ky operacion është mënyra më e shpejtë për të përfunduar luftën, edhe pse po përballet me kundërshtime të forta brenda dhe jashtë vendit.
“Ndryshe nga pretendimet e rreme, kjo është mënyra më e mirë për t’i dhënë fund luftës dhe mënyra më e mirë për ta përfunduar atë shpejt”, tha ai. “Kështu i japim fund luftës”.
Në orët e para të mëngjesit të së premtes, kabineti i sigurisë i Izraelit miratoi planin për pushtimin e Qytetit të Gazës, me synimin për shkatërrimin e Hamasit dhe shpëtimin e pengjeve që mbahen në enklavë, shkruan CNN.
Ky veprim ka ngritur shqetësime serioze se luftimet e mëtejshme do të rrezikojnë jetën e robërve dhe do të përkeqësojnë më tej krizën humanitare tashmë të rëndë.
Në Asamblenë e Përgjithshme të OKB-së të dielën, Izraeli u përball me dënime të ashpra nga vende si Mbretëria e Bashkuar, Rusia, Kina dhe Franca, të cilat e konsideruan planin ushtarak të Netanyahut një “shkelje të mëtejshme të së drejtës ndërkombëtare”.
Operacioni i zgjeruar ushtarak i Izraelit “nuk është një rrugë drejt zgjidhjes, por një rrugë drejt më shumë gjakderdhjes”, tha Mbretëria e Bashkuar. Rusia dënoi planin e Izraelit për ta vënë Gazën nën kontrollin e forcave të saj të sigurisë si “hapa të rrezikshëm që dëmtojnë perspektivat tashmë të brishta për zgjidhjen paqësore të konfliktit të Lindjes së Mesme”.
Danimarka, Koreja e Jugut, Greqia, Sllovenia dhe Gujana ishin ndër ato që i shtuan zërat e tyre një kori kundërshtimi dhe i bënë thirrje Izraelit të ndryshojë kursin.
