Situata në Poliçan është bërë alarmante, teksa një zjarr masiv po përparon me shpejtësi drejt qytetit. Pamjet nga vendngjarja tregojnë zona të tëra të mbuluara nga tymi i dendur, ndërsa flakët kërcënojnë banesat dhe infrastrukturën.
Për shkak të rrezikut të lartë, autoritetet kanë urdhëruar evakuimin e të moshuarve nga azili dhe banorëve të fshatit Plirezë. Zjarri ka avancuar gjithashtu drejt fshatit Mbrakull, duke rritur frikën për përhapje të mëtejshme.
Kryebashkiaku Adriatik Zotkaj ka bërë apel të fortë për ndërhyrje të menjëhershme nga institucionet shtetërore, duke theksuar se situata po del jashtë kontrollit dhe kërkon mobilizim të të gjitha forcave të mundshme për ta neutralizuar.
Në zonë po punojnë forcat zjarrfikëse dhe banorët vullnetarë, por terreni i vështirë dhe kushtet atmosferike po e bëjnë operacionin shumë të vështirë. Autoritetet paralajmërojnë qytetarët që të qëndrojnë larg zonave të prekura për të shmangur rrezikun.
