Pavarësisht se është dobësuar rëndë që nga sulmi terrorist vdekjeprurës i 7 tetorit ndaj komuniteteve izraelite, Hamasi ka vazhduar t’u paguajë paga anëtarëve të tij përmes një sistemi klandestin, të bazuar në para të gatshme.
Sipas një raporti të BBC-së të publikuar të mërkurën, grupi arriti gjatë luftës t’u paguante afërsisht 7 milionë dollarë rreth 30,000 punonjësve të të ashtuquajturit “krah civil”, pavarësisht se pjesa më e madhe e fuqisë së tij ushtarake u shkatërrua nga IDF-ja
Tre anëtarë të atij aparati civil i thanë BBC-së se kohët e fundit kanë marrë pagesa prej rreth 300 dollarësh secili, në një kohë kur banorët e Gazës raportojnë rritje të ndjeshme të çmimeve dhe inflacion në rritje, së bashku me pretendimet se Izraeli po e “vret urie” enklavën.
Raporti tha se shumë anëtarë të Hamasit kanë vazhduar të marrin vetëm rreth 20% të pagave të tyre të paraluftës, zakonisht një herë në dy muaj e gjysmë. Kjo vonesë, e kombinuar me shumat e reduktuara, ka nxitur zemërim midis anëtarëve të thjeshtë të grupit.
Me institucionet financiare të Gazës kryesisht të mbyllura dhe sulmet izraelite që synojnë pikat e shpërndarjes së parave të gatshme, Hamasi ka përshtatur metodën e tij të pagesës. Anëtarët marrin mesazhe me tekst në telefonat e tyre ose të të afërmve të tyre, të cilat i ftojnë ata të “pinë çaj me një mik” në një vend të caktuar. Atje, një i huaj – ndonjëherë një grua – u dorëzon një zarf të mbushur me para të gatshme.
“Sa herë që shkoj të marr rrogën, u them lamtumirë gruas dhe fëmijëve të mi”, tha një anëtar i Hamasit, duke e përshkruar procesin si të rrezikshëm.
Ai pretendoi se i kishte mbijetuar një sulmi izraelit në një pikë shpërndarjeje parash në një treg të qytetit të Gazës.
Një tjetër marrës, një mësues i punësuar nga qeveria e drejtuar nga Hamasi, u ankua për gjendjen e keqe të monedhës.
“Mora 1,000 shekel në kartëmonedha shumë të konsumuara – asnjë tregtar nuk i donte. Vetëm 200 shekel ishin të përdorshme”, tha ai, duke shtuar se pas muajsh pa pagesë, ndonjëherë priste në radhë për shpërndarjen e ushqimit nga grupi amerikan i ndihmës GHF me shpresën për të gjetur miell për të ushqyer fëmijët e tij.
BBC citoi një figurë të lartë të Hamasit, të njohur me procesin, i cili tha se grupi kishte fshehur rreth 700 milionë dollarë para të gatshme brenda tuneleve para 7 tetorit. Paratë, tha ai, u siguruan nën mbikëqyrjen e ngushtë të udhëheqësit të Hamasit, Yahya Sinwar, tani i vrarë nga Izraeli dhe vëllait të tij, Mohammed, gjithashtu i vrarë në luftë.
Hamasi financohet pjesërisht nëpërmjet taksave dhe tarifave doganore mbi banorët dhe tregtarët e Gazës, si dhe financimit të konsiderueshëm nga Katari. Edhe gjatë konfliktit, grupi vazhdoi të vendoste tarifa dhe të shiste mallra drejtpërdrejt.
Për shumë civilë, pabarazia është irrituese. Nisreen Khaled, një vejushë që rrit tre fëmijë, tha se fqinjët e saj – mbështetës të Hamasit – morën thasë me miell dhe pako ushqimore, ndërsa familja e saj vuan nga uria. “A nuk janë ata arsyeja e vuajtjeve tona? Pse nuk u siguruan që të kishim ushqim, ujë dhe ilaçe para se të nisnin aventurën e tyre të 7 tetorit?” tha ajo.
VINI RE: Ky artikull është pronësi intelektuale e Ynet
