Prodhuesit zviceranë paralajmëruan të premten se dhjetëra mijëra vende pune janë në rrezik, pas vendimit të presidentit amerikan Donald Trump për të vendosur një tarifë të re prej 39% ndaj importeve nga Zvicra – një nga më të lartat në fushatën e tij të riformatimit të tregtisë globale, përcjell Reuters.
Qeveria zvicerane e cilësoi vendimin si “zhgënjyes” dhe bëri të ditur se do të shqyrtojë hapat e mëtejshëm. Kjo tarifë e re është më shumë se dyfishi i asaj prej 15% që aplikohet për shumicën e importeve nga Bashkimi Evropian dhe shumë më e lartë se 25% për Indinë, 35% për Kanadanë dhe 50% për Brazilin.
Tarifa e re përbën një goditje të rëndë për ekonominë zvicerane, e cila varet në mënyrë të konsiderueshme nga eksportet – veçanërisht ato të orëve, bizhuterive dhe çokollatës, me SHBA-në si tregun kryesor. Fillimisht ishte propozuar një tarifë 31%, të cilën zyrtarët zviceranë e kishin cilësuar si “të pakuptueshme”.
Shtëpia e Bardhë e justifikoi vendimin duke akuzuar Zvicrën për mungesë “lëshimesh domethënëse” në uljen e barrierave tregtare. Megjithëse sektori farmaceutik – një nga më të rëndësishmit për Zvicrën – duket se për momentin është përjashtuar nga kjo tarifë, ekspertët thonë se pasojat për ekonominë janë serioze dhe të menjëhershme.
