Presidenti i SHBA-ve, Donald Trump, ka urdhëruar vendosjen e dy nëndetëseve bërthamore pranë kufijve të Rusisë, duke reaguar ndaj deklaratave të zëvendëskryetarit të Këshillit të Sigurisë Kombëtare të Rusisë, Dmitry Medvedev, përcjell YNetNews.
Përmes një postimi në platformën e tij “Truth Social”, Trump tha: “Për shkak të deklaratave provokuese të Dmitry Medvedevit, kam urdhëruar vendosjen e dy nëndetëseve bërthamore në zona të përshtatshme pranë Rusisë – vetëm nëse këto deklarata janë më shumë sesa thjesht marrëzi.”
Trump theksoi se “fjalët kanë rëndësi dhe ndonjëherë mund të çojnë në pasoja të padëshiruara.”
Medvedev, ish-president i Rusisë dhe një nga figurat më të larta të sigurisë në vend, kishte shkruar më herët në platformën “X” se “çdo ultimatum nga Shtetet e Bashkuara është një kërcënim dhe një hap drejt luftës.”
Ky zhvillim përshkallëzon më tej tensionet midis dy fuqive bërthamore dhe shton shqetësimet për sigurinë globale në një kohë kur marrëdhëniet SHBA-Rusi janë në nivelin më të ulët të dekadave të fundit.
