Presidenti amerikan Donald Trump dhe presidentja e Komisionit Europian, Ursula von der Leyen, kanë njoftuar arritjen e një marrëveshjeje tregtare të re mes SHBA-së dhe Bashkimit Europian, pas katër muajsh negociatash intensive që kërcënonin të përshkallëzonin në një luftë tregtare transatlantike.
Von der Leyen e cilësoi marrëveshjen si “një marrëveshje të madhe, një marrëveshje të jashtëzakonshme”, e cila do të sjellë “stabilitet” dhe “parashikueshmëri” në marrëdhëniet ekonomike mes dy ekonomive më të mëdha në botë.
“Dy ekonomitë më të mëdha duhet të kenë një rrjedhë të mirë tregtare”, u shpreh ajo.
“Zgjidh shumë çështje dhe ishte një vendim i shkëlqyer,” deklaroi Trump, duke vlerësuar marrëveshjen, përcjell The Guardian.
Marrëveshja përfshin një tarifë doganore bazë prej 15% për shumicën e eksporteve të BE-së në tregun amerikan, duke kufizuar një taksë kufitare më të lartë që ishte në diskutim për mallrat europiane.
Megjithatë, kjo tarifë është më e lartë se ajo që ishte në fuqi përpara ardhjes së Trump në pushtet.
Një pengesë mbetet për industrinë e çelikut, pasi tarifa prej 50% mbi eksportet europiane të çelikut në SHBA mbetet në fuqi.
Gjithashtu, sektorët farmaceutikë janë përjashtuar nga marrëveshja dhe, sipas Trump, mund të përballen me tarifa ndëshkuese në të ardhmen.
Marrëveshja u arrit pas një takimi 40-minutësh në fushën private të golfit të Trump në Skoci, ku ai ndodhet për një vizitë katërditore.
