Pas disa orësh kërkimesh intensive nga palombarët e RENEA-s, është gjetur trupi i pajetë i një 16-vjeçari që u mbyt në lagunën e Patokut, në Kurbin. Ngjarja e rëndë ndodhi sot, më 24 korrik 2025, rreth orës 15:00.
Sipas të dhënave paraprake, adoleshenti kishte hyrë në ujë bashkë me një bashkëmoshatar për t’u larë, duke kaluar përmes kanalit që lidh lagunën me detin.
Ndërsa njëri prej tyre u nxor nga uji dhe u dërgua në gjendje të rëndë në spital, tjetri rezultoi i zhdukur për disa orë, derisa u gjet pa shenja jete nga zhytësit.
Në vendngjarje ndodheshin forcat e Policisë së Kurbinit, Policia Kufitare dhe grupi hetimor, të cilët po punojnë për të zbardhur rrethanat e plota të ngjarjes. Autoritetet vijojnë hetimet për të përcaktuar shkaqet e sakta të tragjedisë.
Ky është një tjetër rast që ngre shqetësimin për sigurinë në zonat ujore, veçanërisht gjatë sezonit veror.
