Izraeli ka nisur një ofensivë të re ajrore dhe tokësore në qytetin qendror të Gazës, Deir al-Balah, një nga zonat e fundit ende të paprekura rëndë nga lufta, por që ka shërbyer si një nyje kyçe për shpërndarjen e ndihmave humanitare në enklavën e shkatërruar.
Sulmet intensive vijnë në një kohë kur Kombet e Bashkuara kanë paralajmëruar për përhapjen e urisë dhe kolaps total të shërbimeve jetike në Rripin e Gazës.
Operacioni pason një nga ditët më vdekjeprurëse të muajve të fundit, kur të dielën, të paktën 85 palestinezë humbën jetën ndërsa përpiqeshin të merrnin ndihma ushqimore, sipas The Guardian.
Agjencia Botërore e Ushqimit (WFP) raportoi se shumica e viktimave ishin qëlluar nga tanket dhe snajperët izraelitë pranë gardhit kufitar, ndërsa prisnin të merrnin miell nga një konvoj ndihmash të OKB-së.
Dëshmitarët përshkruajnë sulme ajrore të fuqishme gjatë natës mbi Deir al-Balah, një zonë që besohej të ishte lënë jashtë shënjestrave deri më tani për shkak të dyshimeve se aty mund të mbaheshin pengje nga Hamasi.
Sipas burimeve izraelite, rreth 20 nga 50 pengjet e mbetura në Gaza mund të jenë ende gjallë.
Ofensiva e fundit izraelite vjen përkundër raportimeve në mediat hebraike se Hamasi mund të ishte pranë arritjes së një marrëveshjeje për armëpushim.
Ndërkohë, përpara nisjes së operacionit, Izraeli dha urdhra evakuimi për 50 deri në 80 mijë njerëz nga Deir al-Balah, duke rritur përqindjen e territorit të Gazës që është nën urdhër evakuimi ose nën kontroll të ushtrisë izraelite në 87.8%.
Kjo ka bërë që mbi 2.1 milionë civilë palestinezë të grumbullohen në vetëm 12% të territorit, ku tashmë nuk ka më furnizime me ujë, ushqim, ilaçe apo energji elektrike.
“Me këtë urdhër të fundit, sipërfaqja e Gazës nën urdhra zhvendosjeje apo brenda zonave të militarizuara nga Izraeli ka arritur në 87.8%, duke i lënë 2.1 milionë civilë të mbijetojnë në një territor të fragmentuar prej vetëm 12%, ku shërbimet esenciale janë shembur,” thuhet në deklaratën e Zyrës së OKB-së për Koordinimin e Çështjeve Humanitare (OCHA).
Sipas Ministrisë së Shëndetësisë në Gaza, vetëm në 24 orët e fundit janë vrarë të paktën 130 palestinezë.
Që nga fillimi i ofensivës më 7 tetor, numri i viktimave palestineze ka kaluar 59,000.
Shumë vende, përfshirë Mbretërinë e Bashkuar dhe 24 shtete të tjera, kanë bërë thirrje për një ndalim të menjëhershëm të luftimeve, ndërsa organizatat ndërkombëtare theksojnë se kushtet në Gaza janë bërë të papërballueshme për civilët e mbetur.
