Qeveria britanike ka njoftuar se mosha minimale për të votuar do të ulet në 16 vjeç në të gjithë Mbretërinë e Bashkuar përpara zgjedhjeve të ardhshme të përgjithshme, duke shënuar një ndryshim të madh në sistemin demokratik të vendit, përcjell Guardian.
Vendimi përfshin për herë të parë gjithë territorin e Mbretërisë së Bashkuar, ndërsa Skocia dhe Uellsi e kishin aplikuar tashmë këtë rregull për zgjedhjet lokale dhe parlamentare rajonale.
Qeveria e udhëhequr nga Partia Laburiste e justifikoi reformën si një hap drejt më shumë drejtësie për të rinjtë 16 dhe 17 vjeç, të cilët tashmë kanë të drejtë të punojnë dhe të shërbejnë në ushtri.
Paketa përfshin gjithashtu:
Zgjerimin e formave të identifikimit të vlefshëm për votuesit, duke përfshirë kartat bankare dhe të veteranëve.
Regulla më të forta kundër ndërhyrjes së huaj në politikë dhe kundër dhunës ndaj kandidatëve apo stafit zgjedhor.
Zhvillimin e një sistemi më të automatizuar për regjistrimin e votuesve, për të shmangur përsëritjen e të dhënave në shërbime të ndryshme shtetërore.
Zëvendëskryeministrja Angela Rayner tha se ndryshimet synojnë të rivendosin besimin në demokracinë britanike:
“Po ndërmarrim veprime për të thyer barrierat që pengojnë pjesëmarrjen dhe për të mbrojtur procesin tonë zgjedhor nga abuzimi. Kjo do të forcojë themelet e shoqërisë sonë në të ardhmen.”
Rregulla të reja për financimin e fushatave
Qeveria do të mbyllë boshllëqet ligjore që lejojnë ndikimin e parasë së huaj në zgjedhjet britanike. Donacionet nga kompani guackë apo të lidhura me jashtë do të kontrollohen me rregulla të reja:
Kompanitë që dhurojnë para do të duhet të vërtetojnë se gjenerojnë të ardhura në Mbretërinë e Bashkuar apo Irlandë.
Do të vendosen gjoba deri në 500 mijë paund për shkelësit.
Çdo deklaratë e rreme ose mashtruese do të konsiderohet vepër penale.
Partitë do të jenë të detyruara të kryejnë kontrolle për të njohur burimin e fondeve (“know your donor”) dhe do të ndihmohen nga udhëzime të reja të Komisionit Zgjedhor.
Ky vendim vjen në një kohë kur kishte presion për reforma më të thella në transparencën e financimeve politike, sidomos pas lajmeve për përpjekjet e Elon Musk për të dhuruar miliona paund për Reform UK – një plan që më pas u braktis.
Mbrojtje për kandidatët dhe stafin zgjedhor
Ligjet do të ndryshojnë për të mbrojtur kandidatët, aktivistët dhe punonjësit zgjedhorë nga ngacmimi dhe abuzimet:
Kandidatët nuk do të detyrohen më të publikojnë adresën e banesës në materialet zgjedhore.
Ngacmimi ndaj tyre do të konsiderohet rrethanë rënduese në rastet penale.
Personat e dënuar për intimidim ndaj një kandidati nuk do të lejohen të kandidojnë në të ardhmen.
Këto masa vijnë si përgjigje ndaj shqetësimeve në rritje për sigurinë dhe integritetin e procesit zgjedhor në MB.
