Më shumë se 14 milionë fëmijë mbetën plotësisht të pavaksinuar në vitin 2024, tha OKB të martën.
Në Evropë dhe Azinë Qendrore, normat mesatare të vaksinimit të fëmijëve kanë mbetur në vend ose kanë rënë me 1%, thanë Organizata Botërore e Shëndetësisë (OBSH) dhe UNICEF në një raport të përbashkët.
Zyrtarët paralajmëruan se dezinformimi i përhapur dhe shkurtimet e rënda të ndihmës ndërkombëtare po zgjerojnë boshllëqet në mbulim, duke vënë në rrezik miliona fëmijë .
Sëmundjet e parandalueshme në rritje në Evropë
Në Evropë, rastet e kollës së mirë u trefishuan në gati 300,000 në vitin 2024, ndërsa infeksionet e fruthit u dyfishuan në mbi 125,000, tha OBSH, për shkak të rënies së mbulimit me vaksina.
Ndërkohë, vetëm nëntë vende – Nigeria, India, Sudani, Republika Demokratike e Kongos , Etiopia, Indonezia, Jemeni, Afganistani dhe Angola – përbënin më shumë se gjysmën e fëmijëve të pavaksinuar në botë.
“Miliona fëmijë mbeten pa mbrojtje kundër sëmundjeve të parandalueshme”, tha në një deklaratë Drejtoresha Ekzekutive e UNICEF-it, Catherine Russell. “Kjo duhet të na shqetësojë të gjithëve.”
Rastet e fruthit rriten në të gjithë SHBA-në
Raporti shëndetësor vjen në një kohë kur, 25 vjet pasi OBSH-ja kishte deklaruar se fruthi ishte eliminuar nga Shtetet e Bashkuara , vendi po përjeton vitin e tij më të keq për sëmundjen .
SHBA-të kanë pasur 1,288 raste të fruthit në vitin 2025, ndërsa sëmundja e parandalueshme nga vaksina përhapet, raportuan javën e kaluar Qendrat për Kontrollin dhe Parandalimin e Sëmundjeve.
Sipas OKB-së, vaksinat parandalojnë 3.5 deri në 5 milionë vdekje në vit./DW
