Një zjarr i fuqishëm i shkaktuar nga rrufetë ka shpërthyer në veriperëndim të Parkut Kombëtar të Grand Canyon në Arizona, duke detyruar mbylljen e hyrjes nga ana veriore (North Rim) dhe nxitur urdhra evakuimi për banorët pranë zonës së Jacob Lake.
Zjarri, i quajtur “White Sage Fire”, ka përfshirë mbi 400 hektarë tokë dhe vijon të jetë plotësisht jashtë kontrollit, sipas autoriteteve, të cilët e përshkruajnë atë si “0% i përmbajtur”, përcjell BBC.
Temperaturat ekstreme, erërat e forta dhe vegjetacioni i thatë kanë krijuar kushte tepër të rrezikshme që po përshpejtojnë përhapjen e flakëve. Një paralajmërim për të nxehtë ekstrem është lëshuar për të premten, me temperatura që pritet të arrijnë deri në 46°C, ndërsa vizitorët janë paralajmëruar të shmangin ecjet në Grand Canyon.
Njëkohësisht, Parku Kombëtar raportoi se një alpinist 67-vjeçar nga Teksasi humbi jetën të martën në South Kaibab Trail. Ai u gjet pa ndjenja dhe nuk u mund të ringjallej pavarësisht përpjekjeve të shpëtimtarëve.
Zjarri është duke u luftuar nga toka dhe ajri me mjete zjarrfikëse dhe helikopterë që hedhin substanca për ndalimin e përhapjes. Autoritetet urdhëruan evakuim të menjëhershëm për të gjithë vizitorët në pjesën veriore të parkut.
Për shkak të zjarrit, segmenti i rrugës shtetërore State Route 89A është mbyllur për një kohë të pacaktuar, ndërsa autoritetet rrugore paralajmëruan vonesa të gjata për drejtuesit e mjeteve.
Rreziku nga zjarret nuk kufizohet vetëm në Arizona. Të enjten, u evakuuan të gjithë stafi dhe vizitorët nga Parku Kombëtar “Black Canyon of the Gunnison” në Kolorado, pasi rrufetë ndezën disa vatra në të dy skajet e parkut. Autoritetet thanë se po përballen me rreth 10 vatra aktive të shkaktuara nga rrufetë në të gjithë rajonin.
Zyrtarët e zjarrfikjes thonë se po punojnë në bashkëpunim të ngushtë me agjencitë përkatëse për të frenuar përhapjen e flakëve dhe për të garantuar sigurinë e komuniteteve përreth.
