Tridhjetë militantë të Partisë së Punëtorëve të Kurdistanit (PKK) dogjën armët e tyre në hyrje të një shpelle në Irakun verior të premten, duke shënuar një hap simbolik, por domethënës drejt përfundimit të një kryengritjeje dhjetëvjeçare kundër Turqisë.
Pamjet nga ceremonia treguan luftëtarët, gjysma e të cilëve ishin gra, duke pritur në radhë për të vendosur automatikët AK-47, fishekë dhe armë të tjera në një kazan të madh gri, shkruan Reuters.
PKK-ja, e bllokuar në konflikt me shtetin turk dhe e jashtëligjshme që nga viti 1984, vendosi në maj të shpërbëhet, të çarmatoset dhe t’i japë fund luftës së saj separatiste pas një thirrjeje publike për ta bërë këtë nga udhëheqësi i saj i burgosur prej kohësh, Abdullah Oçalan.
Pas një sërë përpjekjesh të dështuara për paqe, nisma e re mund t’i hapë rrugën Ankarasë për t’i dhënë fund një kryengritjeje që ka vrarë mbi 40,000 njerëz, ka rënduar ekonominë dhe ka shkaktuar përçarje të thella sociale dhe politike në Turqi dhe në rajonin e gjerë.
Presidenti Tayyip Erdogan tha se shpresonte që shpërbërja e PKK-së do të forconte sigurinë turke dhe stabilitetin rajonal. “Zoti na dhëntë sukses në arritjen e qëllimeve tona në këtë rrugë që ecim për sigurinë e vendit tonë, paqen e kombit tonë dhe vendosjen e paqes së qëndrueshme në rajonin tonë”, tha ai në X.
